دى حالة بنتى بالتفصيييييييييييل منذ الولادة لمزيد من الأراء .. أرجو الإهتمام

[أختكم فى الله]

أنا عارفة إن الكلام هيطول وممكن ياخد من وقتكم حوالى 10 أو15 دقيقة بس عشمى فيكم إنكم هتساعدونى وهتقرؤه وتقلولى رأيكم بصدر رحب لأنكم أكتر ناس حاسين بيا وبقلقى و أنا كمان محتاجة أكتب الكلام ده علشان أجمع أفكارى وأنشط الذاكرة بتاعتى قبل ما أعرضها على أى دكتور علشان تكون ردودى جاهزة على أى سؤال ممكن يسألهولى .. وكمان الصورة تكون أوضح ليكم علشان تفيدونى بخبرتكم

بسم الله

أنا ولدت بنتى الحمد لله ولادة قيصرية بس بدون مشاكل الحمد لله ورضعت طبيعى الحمد الله من أول يوم

المهم تطورات حبيبة كانت طبيعية جدااا بدأت تضحك بعد شهرين ونصف تقريبا وكمان بدأت المنغاة يمكن من شهر ونص كانت تبصلى وتقعد تصدر أصوات جميلة ورقيقة كانت بتفرحنى جدااا وفضلت المناغاة تتطور وتناغى كتير حتى عندنا فى عيليتنا بدأوا يقولوا عليها إنها رغاية

بس هى إتأخرت فى التقليب وكمان فى رفع رقبتها لوحدها وكتفها لدرجة إنها جلست عند سن 6 شهور بدون مساعدة بس لو نامت على ظهرها مكنتش بتتقلب ولو على بطنها مكنتش بترفع كتفها بإيديها ووالدها ورانى فى أحد الكتب مخطط كدة بيقول إن الأطفال ممكن ميمروش بالمرحلة دى ويجلسوا على طول

بالنسبة بقى للتواصل الإجتماعى فى الوقت ده كان متوسط بس يعتبر أقل من إللى فى سنها بس كنت دايما بقول إن ده بسبب إنى أنا وهى أغلب الوقت بنكون لوحدينا فى البيت بسبب إنشغال والدها وكمان كنت بسيبها وقت كبير لوحدها بسبب شغل البيت طبعا حتى الزيارات كانت محدودة جدا ياإما بيت أهلى أو بيت أهل زوجى وخصوصا إنها إتولدت فى أول فصل الشتا وكان خروجنا من البيت قليل جداااا بس الجو..وكنت دايما أسمع من زوجات الدكاترة إللى أعرفهم إن أولادهم كانوا مرتبطين جدا بأمهاتهم حتى مكنوش مرتبطين بوالدهم وكانوا مش إجتماعين هى كانت بتحب والدى جدا وبتبتسمله أول ما تشوفه وكان أى حد فيهم يشيلها مكنتش بترفض ولحد دلوقتى بس لما كان حد فيهم زى أمى مثلا تقعد تبوس فيها كتيرلحد ما تزهق وتعيط بقت لما تشوفها ماترضاش ترحلها بس دلوقتى بقت تروحلها وتبوسها بنفسها

بس كانت فى أى مكان زحمة بتعيط وبتضايق وبالذات لما يبدأو الناس يشيلوها من إيد لإيد وكنت بفسر ده إننا دايما لوحدينا علشان كده هى مش متعودة على الزحمة

بس بنتى فى الوقت ده كان الملفت للنظر فيها إنها لما كانت بتنام على ظهرها كانت بتبدل برجليها كأنها بتجرى أو بتعوم فى حركة منتظمة جدااا ملفتة للنظر وكانوا يضحكوا عليها ويقولوا دى هتطلع بطلة جرى أو سباحة

ولما بدأت تقعد وكمان قبل ما تقعد بدأت تتابعنى أنا وأبوها بنظرها وكانت بتبكى لما بمشى من المكان وأحيانا كانت بتحاول تلفت نظرى ليها لما بعدى من قدامها وأنا مشغولة بإنها تضحك مثلا وتقول آه وممكن ترفع إيديها علشان أشيلها وإن عديت من عليها ومشيلتهاش كانت تبكى

[أختكم فى الله]

وبدأت تلتفت للتليفزيون لقناة فيها أناشيد أطفال بتتكرر كتير فى نفس اليوم فبدأت لما تيجى أناشيد معينة تفرح وتبص على التيليفزيون وده كان مفرحنا إن بدأت تتأثر بالعوامل إللى حواليها وبصراحة بدأت ألجأ للتليفزيون كتير علشان ألهيها فيه علشان أعمل شغل البيت وكنت برده بحطلها لعب حواليها مناسبة لسنها لأنها كمان كانت متقلبة المزاج بسرعة وعايزانى جمبها على طول وكنت بقول إن تقلب المزاج ده بسبب التسنين لأنها بدأت تسنين فى آخر شهرها الرابع وكنت دايما أسكتها بالرضاعة فارتبطت بالرضاعة جدا وكل أما أشيلها كانت تعوز ترضع وتبكى علشان أرضعها وده كان بيخلينى مش بعرف ألاعبها كتير كان أكتر وقت بينا مقضينوا فى الرضاعة علشان متعيطش أمى كانت بتقولى إنى كنت كدة وأنا صغيرة والبنات بالذات بيحبوا يرضعوا كتير وأمى فطمتنى سنة وشهرين علشان السبب ده

المهم بعد ما بقت بتقضى وقت كبير قدام التيليفزيون لاحظت عليها إنى لما كنت بقعدها ووراها أى مسند أومخدة كانت تخبط دماغها فيها أكتر من مرة وكنت فاكراها بتلعب ومبسوطة وبدأت تحرك إيديها كتير وتبص ليها وكانت ألعابها المفضلة وقتها الشخشيخة وشوية لعب كدة بتتلف بالإيد وبتعمل صوت وكانت ملونة وطبعا كانوا فى بقها على طول وكانت بتلعب بيهم كلهم مش بتفضل حاجة عن التانية وكمان كان فى عروسة بباها أشترهالها كانت برضه بتحبها وتضحكلها لما تشوفها

وعند 8 شهور بدات تخاف من الغرباء ومتروحش لحد غريب خالص بس أهلنا تروحلهم عادى بس فى وجودى كانت بتفضلنى على الجميع ورأى الكل فيها إنها عكنونة ومتقلبة المزاج وتقيلة وراسية ومحدش فى دماغها يعنى فى أطفال كانوا بيضحكوا على طول حتى للغرب بس هى مكنتش كدة يعنى كانت بتضحك لأهلنا بالعافية حسب مزاجها

بس لما حد كان بيمدلها إيدوا علشان يشيلها كانت بتمد إيديها له وتروحله وطبعا المناغاة تطورت وبقت بتقول بابا وماما وأى حروف تانية زى مثلا أكا دا با حسب الظروف يعنى وكانت بتسهر كتير ونومها متقطع بس كنت حاسة إنه بسبب الرضاعة بتحب ترضع طول الليل بس مكنتش بتبكى كتير بالليل ونادرا اما كانت تبكى بدون سبب أغلب أسباب بكأها إنها بتكون لوحدها وعايزة حد معاها أو تكون عايزة ترضع وتنام

[أختكم فى الله]

هتستغربوا جدا لو قلتلكم إنى فى الفترة دى تقريبا مكنتش بنادى عليها خالص بإسمها لأنى مكنتش أعرف إنها المفروض تكون عرفت إسمها وبعدين فى يوم أخوية قالى إنها المفروض تكون عرفت إسمها فندهت عليها وبصتلى وكمان والدى نده عليها فبصتله

وبعد كدة مكنش عندى الأسباب إللى تخلينى انده عليها كتير لأنها إتأخرت جدا فى السحف فكانت دايما فى مكانها يعنى مش بتروح مثلا فى مكان علشان أنده عليها

ولما وصلت للعشر شهور بدأت تتغير شوية إجتماعيا يعنى معدتش بتضحك لوالدى وبقت مرتبطة بيا أكتر والحكاية دى قلقتنى بس قرأت إن فى أطفال بيمروا بمرحلة خوف الإنفصال عن الأم من سن 10 شهور حتى 18 شهر وبيكونوا مش إجتماعيين فاطمنت عليها وقولت ده طبيعى وكنت خايفة من التوحد بس لما قريت أعراض التوحد قبل 18 شهر إتطمنت أكتر لأنها مكنتش منطبق عليها خالص غير بس إنها بتحرك إيديها وتبص عليها بس مكنتش دى لعبتها الوحيدة دى كانت بتعملها لما بتزهق من اللعب

أنا عارفة إنى طولت جداااااااا ولسه عندى كلام كتير كمان بس سامحونى أنا حاليا محتاجة جدااا أفتكر الأحداث دى وكمان محتاجة رأيكم فيها

ولما وصلت لسن سنة كنت مستغربة هى ليه مش بتعمل أى حركة جديدة زى الأطفال مثلا زى باى أو هاتى بوسة وبعدين قولت يمكن لازم أعلمها تعمل كدة أكيد هى مش هتعرف لواحدها المهم أنا كنت علمتها تدينى حضن أو كلمة نامى وهى عندها 9 شهور وعلمتهالها من أول مرة ولسة لحد دلوقتى بتعملها .. حاولت أعلمها تعمل باى فضلت معاها تقريبا أسبوع وبدأت تعمل باى لما أقولها بس كانت بتبص فى إيديها وهى بتعمل باى أما بقى هاتى بوسة إتعلمتها فى يوم واحد بس وبدأت ألغى حكاية التوحد دى من تفكيرى خالص وأقول البنت كويسة وبتستجيب وبتتواصل وخصوصا لما قرأت إن المتوحد مش بيعرف يلعب الألعاب الثنائية زى الكورة يعنى خد وهات بدأت أديها الكورة وأقولها هاتيها مكنتش الأول بتديهانى وبعدين بدأت تديهانى بإنها تزوقها قدامها كدة وتستنانى إنى أديهالها وبدأت تتأقلم اكتر مع أهلنا بس برده بالمقارنة بالأطفال الأخرين تواصل متوسط يعنى بس مش رفضاهم وبالنسبة للرد على النداء كانت بترد بنسبة 50 فى المية بس لما تندهلها أول مرة كانت تبص وتانى مرة لأ حتى كنت بحس إنها فاهمة إننا بنندهلها بدون سبب فبطنشنا

[أختكم فى الله]

وفى الفترة دى لاحظت إن عينيها بيحصلها حول متقطع كدة مش دائم وعرضناها على طبيب عيون ووجد إن عندها إستجماتزم بنسبة -2,5 وعملنالها نظارة طبية وللأسف لبستها بس 10 أيام وبعد كدة بدأت تقلعها وتلعب بيها ومش راضية تلبسها أبدااااااااااااااااا مع كل المحاولات والحيل إللى مفيش مجال لشرحها دلوقتى وكنت ساعات بحس إن ضعف نظرها ده ممكن يكون مأثر عليها أو هو السبب فى إنها بتبص لإيديها كتير لأنها أوضح حاجة ليها وبتبص للنور كتير وخصوصا فى الشارع أعمدة النور أكتر حاجة بتلفت نظرها عن الأشخاص وكمان كنت بقول إن تأخرها فى المشى مقلل خبرتها ومش عارفة تكتشف حاجات جديدة

أنا كنت فاكرة إنها علشان مسحفتش الوقت ده كله إنها مش هتمر بالمرحلة دى وهتمشى على طول بس لاحظت إنها بدأت تسحف وهى عندها سنة و3 شهور ولحد دلوقتى لسة بتسحف وتطورها فى المشى بطئ جدااا وبدات تهتم باللعب بالحاجات إللى بنستعملها أكتر يعنى مثلا الموبايل أو تيليفون البيت أو زجاجة الماية وشبشب الحمام والريموت وتشد سلوك الكهربة بس كانت بتمسكهم بس وتبص عليهم يعنى محولتش مرة تحط سماعة التيليفون على ودنها أو تضغط على زرار فى الموبايل مثلا وحتى المشط تمسكه تبص عليه او تحطه فى بقها وكمان بترفض اللعب الجديدة لفترة وبعد كدة تبدأ تلعب بيهم بس لاحظت إنها مش بتلعب بيهم أكتر من إنها بتبص عليهم من جميع الإتجاهات يعنى مش بتضغط على أى زرار فى اللعبة علشان تطلع صوت مع إنها بتشوفنى وانا بضغط عليه

اللعب الوحيدة إللى بتلعبها كويس إللى بتلف وأحيانا ألاقيها بتبص للعبة وتكلمها أو تخبط فيها وأحيانا تكتفى بإنها تمسكها بس وده لما بيكون التيليفزيون مفتوح وعندها كتاب فى صور ملونة الأول كانت رفضاه نهائى ومش بتحب تبصله حتى وبعد كدة بدأت تمسكه ودلوقتى بقت بتقلب فى صفحاته وتتفرج وتتكلم بس بحس إنها لما بتلعب بلعبة بتاخد معاها وقت أكبر من باقى الأطفال إللى بيزهقوا من لعبة معينة بسرعة ويشوفوا غيرها ويحبو يكتشفوا حاجات جديدة أم زوجى بتقولى إن زوجى كان كدة كان ممكن يلعب بعربية صغيرة لمدة ساعة وهو قاعد مكانه ميزهقش لدرجة إن عيلته كلها قالتلى الحكاية دى كتير وبتحبنى الاعبها بإنى أخبى وجهى وأندهلها وبعدين أقولها بخ لدرجة إنى أول ما أشيلها على رجلى تشد إيدى وتقولى آخر حرف من إسمها (به)وتضحك علشان ألاعبها وكمان لما بتعوزنى اطبطب عليها تقعد تطبطب على نفسها وتقول هووووووووهوووووو زى ما بعملها وبتحب تشوفنى جدا وأنا بصلى لدرجة إنى لما أقولها كلمة أصلى قبل حتى ما ألبس لبس الصلاة بتتلفت ليا وبتفرح وتستنانى لما ألبس وأبدأ الصلاة بس محولتش مرة تقلدنى وانا بصلى مع إنها بتقلد حركات لينا كتير زى الطبطبة وكمان لما بميل راسى ليها بتميلها غير كمان بتقلد الكحة والعطسة وحاجات كتير من النوع ده..ولما جرس التيليفون بيرن بتفرح وبتجينى وتتكلم كلام مش مفهوم وتبصلى وانا برد على التيليفون بس من غير ما تشاور على التيليفون

فى الفترة الأخيرة دى بقى بتعبرعن جوعها بإنها بتحرك فمها وتعمل صوت كأنها بتاكل بس مش بتشاور على حاجة ولا بتقول مم

ولما بقولها (أمبو ماية) وبتكون عطشانة بتتلفتلى بسرعة جدااااااا وبتكون عطشانة فعلا بس مبتقولش أمبو من نفسها

بس لما بشيلها وبتكون عاوزة ترضع بتمسك هدومى وتقولى إجع أو إضع

بس أكتر حاجة لفتت نظرى الأيام دى إنها أغلب الوقت بتقضيه فى تحريك إيديها وتبص ليها أو اللعب بألعاب معينة وترفض اللعب الجديدة وكمان مش بترد على النداء خاااالص حتى إنى ساعات بنده عليها أكتر من مرة متبصليش وبعدين أقولها (إرضع) مرة واحدة بس تبصلى على طول وتفرح وكمان لما قرأت إن من أعراض التوحد بعد 18 شهر إنها مش بتشاور على الأشياء وكمان مش بتلفت نظر الأم للأشياء إللى بتحبها فده صدمنى لأنى مكنتش شيفاه فيها ولأنها طفلتى الأولى كنت متخيلة إنها لسة صغيرة ولسه هتعمل الحاجات دى

[أختكم فى الله]

وبالنسبة لوالدها علاقتها بيه كويسة جدا وبتحب تقعد فى حضنه ولما بيرجع للبيت أو تشوفه بعد ما يكون غاب عن البيت بتفرح وبتمد إيديها له واى حد بيدخل البيت غيره برده بتابعه بنظرها

وكمان لاحظت إنها بتحب تبص فى المرايا وبتكون مبسوطة حتى إنى بدأت اخدها معايا المطبخ علشان متقعدش لواحدها كتير فشافت صورتها فى زجاج فرن البوتاجاز بقت فرحانة جداااا وكل اما أطلعها المطبخ ترجع تروح لوحدها

بالنسبة لتواصلها مع الأطفال إللى فى سنها هى تقريبا مبتشوفش أطفال كتير بس لما بتشوفهم لاحظت إنها بتبصلهم وتبدأ تتكلم معاهم كلام مش مفهوم بس الوضع ده مش بيدوم كتير بعد شوية بتتجاهلهم وشوية تانين تبصلهم بس بلاحظ إن الأطفال التانين بيبصولها اكتر منها وبيكونوا مركزين معاها اكتر

وبالنسبة لشعورها بالألم طبيعى يعنى مش منعدم ولا مبالغ فيه وبالنسبة لأكلها انا دخلت ليها منتجات الألبان زى الزبادى يعنى وهى فى الشهر الثامن وملاحظتش عليها أى تغيير زى القئ مثلا أو إسهال أو إمساك أو حتى فى التصرفات بالعكس دا من الشهر الثامن للشهر العاشر كان من أحسن الأوقات إللى كانت بتتواصل فيها إجتماعيا مع الآخرين ومزاجها مستقر ..وأنا بحس دايما إن مزاجها مرتبط أكتر بحاجتين النوم والتسنين يعنى الوقت إللى مش بتكون واخدة كفايتها من النوم بالليل أو بالنهار بيكون مزاجها وحش مع الكل حتى إحنا أو لما بتكون بتسنن

وبالنسبة للكلام هى فعلا بتقول كلام كتير غير مفهوم وأحيانا مش بيكون موجه لحد بس هى لما بتشوفنى بتوجهلى كلام مش مفهوم وحتى كمان جدها برده بتوجهله كلام وابوها وبيقعدوا يضحكوا علشان مش فاهمين كلامها وكمان ساعات تمسك العروسة بتاعتها وتبصلها وتقعد تقول كلام مش مفهوم

[أختكم فى الله]

وبعد ما كتبت موضوعى الأول على المنتدى وقولتولى حاولى تركزى على نقاط ضعفها بدأت اكررلها كلمة ماما كتير وبدات تقولها فعلا أكتر من الأول وحتى ساعات تبكى وتجينى وتقول ماما ماما ده خلال يومين أو تلاتة.. حتى باباها بيمشيها فى البيت كدة وبيقولها تاتا فضلت تقول وراه تاتا ... وإمبارح جدها كان عندنا ولما خرج من الباب كانت عاوزة تمشى معاه وقعدت تقول ماش ماش وتعيط ... وكمان هى بتحب البطاطس فكنت بأكلها بطاطس وأقولها بطاطس لاقيتها بتقول تاتس ..وكمان من فترة لاحظت إنها كانت بتحب تلحس السيراميك بلسانها وطبعا ده تصرف غريب برده قلقنى فكونت بقولها كخخ كخخ وانا منفعلة وأشيلها وبعد كدة لما أقولها كخخ من بعيد كانت تبطل وتعيط ودلوقتى من اول مرة اقولها كخخخ تبطل من غير ما تعيط وحتى إنها تقريبا معدتش بتعملها تانى أنا بصراحة لما بشوف الحاجات دى بتفائل واقول إنها كويسة بس انا بلاحظ إنها بتكون مركزة معايا لما بديها صورة أو أنطقلها كلمة بتكون مركزة مع شفايفى كويس ومبسوطة بس لما بحاول أعلمها أى مهارة معتمدة على إيديها أوصوابعها بتشد إيديها وترفض وإن عملتها بتكون باصة فى إتجاه تانى يعنى انا علمتها تضغط على زرار الموبايل علشان تعيد الأناشيد بس مش بتعمل كدة إلا لما أمسك إيديها وكمان أوقات كتير مش بتبص على الزرار بتكون باصة فى إتجاه تانى..وإمبارح روحت بيها عند بيت أهلى وبصراحة كانت مبسوطة جدا ومتاقلمة وكانت بتضحك لوالدى ولأمى وبتبدأ معاهم اللعب وبتبص على الرايح وإللى جاى ولدرجة إن خالى نده عليها مرتين وبصتله أنا قولت يمكن علشان مش بتسمع صوته كتير بصراحة إللى يشوفها إمبارح يقول مجنون إللى يقول إن عندها توحد

وأرجع تانى اقول لو حتى لكل حاجة عندها تفسير طيب إيه تفسير إنها مش بترد على إسمها وكمان مش بتشاور أو تلفت نظرى لحاجة وكمان لاحظت إنها لما كان عندها 5 شهور كانت بتبكى لو أى طفل بكى قدامها أما دلوقتى لو أنا حتى بكيت قدامها مش بتتأثر دى أحيانا بتضحك وكمان بحس إن فى بعض المواقف لما بتتكرر بيكون رد فعلها هو نفسه كل مرة يعنى لما تب صفى المرايا دايما تقول بابا ولما تشوف صورة معينة بتضحك بنفس الطريقة ولما بتشوف مكان معين برده بتكرر نفس الفعل إللى بتعمله زى الضحك أو كلام معين حتى لما بصلى بيكون رد فعلها واحد وتصرفاتها واحدة ..كل أملى إنها لاقدر الله لو عندها توحد ميكونش شديد الوطأة أو يكون لسة فى مفاجآت ربنا ينجيها يارب من كل سوء ومش متخيلة إن ممكن تكون أى حاجة تانية تسببلها أعراض التوحد دى وخصوصا إنى تقريبا من وهى عندها 11 شهر بشك فى تصرفاتها وغريزة الأمومة طبعا قوية وحساسة وانا كل إحساسى دلوقتى إن بنتى مش طبيعية زى إللى فى سنها ونفسى أطمن عليها وإن شاء الله خلال أيام هنعرضها على دكتور فى مصر مبدئيا يعنى وربنا يدبر لنا أمرنا إن شاء الله ويسهلهولنا ويخفف عنا البلاء

أنا عارفة إن كلامى كتيييييييير وطويييييييل بس انا معملتش كدة إلا لما شوفت صداقتكم ووقوفكم جنب بعض وتعاونكم مع بعض وعندى امل إنكم هتقرأوه بصدر رحب وتقولولى رأيكم وملاحظتكم

[ريم أحمد]

أختي العزيزة
غريزة الأم غالبا ما تكون صادقة. لا أريد أن أزعجك بكلامي، لكن غالبا ما تكون الأم بسبب حبها لأطفالها أكثر الناس قدرة على استشعار وجود مشكلة.
بالنسبة لي أنا فقد بدأت أشعر بمشاكل ابني في عمر الخمسة شهور عندما تأخر في الجلوس. محمد ابني تأخر في كل المهارات الحركية بالإضافة إلى أنه يعاني من ارتخاء في العضلات Hypotonia. للأسف عرفت لاحقا أن التأخر في المهارات الحركية قد يكون عرضا من أعراض التوحد عند فئة قليلة من الأطفال. لكن أيضا قد يكون راجع لأسباب أخرى.
عموما، كل ما ذكرتيه عن ابنتك في العمر الأصغر لا يظهر فيه أي شيء واضح مقلق بالنسبة لي. لكن الأمور التي ذكرتيها في أواخر كلامك عن عدم استخدامها الإشارة وعن عدم الرد أحيانا على اسمها وحركات اليد التكرارية هي علامات مقلقة بعض الشيء. ابني محمد كان عنده حركات تكرارية تعود لعمر الشهرين، فقد كان عندما يستلقي على ظهره يرفع رجليه عاليا ثم يخبطهما بقوة على الأرض أو السرير، لدرجة أنني كنت مضطرة أن أضع وسادة تحت قدميه خوفا عليه وفعلا كنت مستغربة كيف لا يشعر بألم الضربات القوية!
للأسف في عالم التوحد قد يكتسب الطفل مهارات طبيعية كاملة لعمر السنة والنصف ثم يفقدها.
الشيء الرائع فيما ذكرتيه هو أن قدرة ابنتك على التعلم تبدو جيدة، ما شاء الله، ابني مثلا استمريت في تعليمه أن يلوح بيده (باي) لأكثر من ثلاث سنوات دون جدوى!!!
أختي العزيزة
تأنّي كثيرا في اختيار الطبيب الذي ستذهبين إليه. وأعتقد أنه مهما كان الطبيب بارعا ففي الغالب سيقول لك أنه من المبكر جدا الحكم على حالة الطفلة. أيضا من الممكن أن يقول لك أنك تتوهمين وأن الطفلة سليمة، ومع ذلك اتبعي غريزتك (الصوت الصغير على رأي الأخت علوش)، واستمري بالاهتمام بتعليم ابنتك كل ما ينقصها من مهارات تتناسب مع عمرها، كما أرجو أن تهتمي بتغذيتها وتبعديها عن المواد الحافظة والملونات وكل ما هو غير طبيعي. استفيدي من كونها وحيدة ووجهي كل طاقتك لها.
الله يوفقك أختي الكريمة

[أختكم فى الله]

جزاكى الله أختى ريم على الرد والإهتمام .. بصراحة كلامك بيأكدلى شعورى لأن بنتى للأسف كانت بتعمل نفس الحركة إللى بتقولى إن ابنك كان بيعملها وفعلا كنت بحطلها مخدة تحت رجليها علشان كعب رجليها ميوجعهاش بس هى بطلت الحركة دى دلوقتى خالص من أول ما بدأت تجلس بس كانت بتعملها أثناء نومها كمان او اول ما تصحى من النوم بس إنتهت الحكاية دى دلوقتى خالص .. والله يا أختى أنا إحترت وبدعو الله إنى أعرف الحقيقة قريب مهما كانت علشان أرتاح وأرسى على بر والله المستعان

[أم حنيفة]

اختي بالنسبة لي ا بني كان طبيعيا حتى تقريبا السنتين و نصف ثم بدأ يتغير اتمنى لك من كل قلبي ان تكون ابنتك بخير ان شاء الله

[فوضت امري لله]

[align=justify]

اختي الفاضلة
الله يطمنك على ابنتك عاجلا غير آجل
...و النصائح اللي ذكروها لك الامهات في موضوعك الاول من ذهب ....
ورأيي من رأي الاخت ريم بما ذكرته واحساس الام وغريزتها ابرع من اي طبيب ....
والله يوفقك بالطبيب الذي يشخص الحالة تشخيص صحيح بدون تهويل او تهوين
وحتى لاقدر الله لو كان التشخيص توحد او اي اضطراب اخر ...ان شاء الله تكون الحالة خفيفة
لأن ابنتك تستجيب لتعليمك ولا تقاومه وتواصلها البصري جيد ...وهذا امر رائع جدا ...يسهل لك عملية تعليمها

ويوجد نقاط مشتركة بين حالة ابنتك وابنتي مثل عدم الالتفات لأسمها وعدم الاشارة و رفض تعلم المهارات التي تعتمد على استخدام الايدي ...وعدم النظر في يدها اثناء اداء المهارة ....وكذلك رفض اللعبة الجديدة ... فابنتي بالرغم من حبها الشديد لمشاهدة الافلام التعليمية مثل بارني ..وغيرة ....الا انه عندما نشتري شريط جديد بدل ان تنظر للتلفزيون تنظر للأرض بنظرة جانبية ...او تعلن عن غضبها بالبكاء وتقوم بحركات تفهمنا من خلالها انها تود تغيير الشريط ....

والاخصائيين شخصوا حالة ابنتي بسمات توحد .... زرت اشهر الاطباء ومراكز ذوي الاحتياجات الخاصة ...كانو يرفضو ان البنت عندها توحد او سماته بشكل قاطع وكأن اصابتها بالتوحد مستحيلة ...معتمدين في ذلك على ان التواصل البصري والاستجابة لنداء جيدين عندها ...وهم للأسف ليسو جيدين الا مع الاغراب الذين تلتقيهم اول مرة .....
ولكني تبعت احساسي وواصلت البحث والقراءة والبحث عن من يفهمني حالة ابنتي حتى وجدت اخصائي نفسي من اول زيارة قالي يبدو ان ابنتك تحمل سمات توحدية واصر انها لاتعاني التوحد وانما سمات فقط ....
بمجرد ان اكد لي شكوكي ...بدأت الحمية وبعد ان بدأتها بايام اشارت لأول مرة لبرنامج كرتوني في قناة الجزيرة للأطفال وقالت لي (فافا) اسم الشخصية الكرتونية ...وبدأت تستجيب لنداء اسمها بنسبة بسيطة .....بفضل الله

عزيزتي لم اقصد اثارة قلقك بذكر النقاط المشتركة بين ابنتي وابنتك ولكن الوقاية خير من العلاج ...وان شاء الله اجتهادك في تدريبك لها في هذا السن الصغير يقضى على اي تأخر تعانية سواء في التواصل او الاستجابة او غيره

ان شاء الله توفقي بالتشخيص السليم والطبيب المعالج البارع
ويارب ماتحتاج ابنتك أي دواء او حمية وتستطيعي مساعدتها عن طريق التدريب فقط
[/align]

[أم عبيدة]

إنها بتبص لإيديها كتير لأنها أوضح حاجة ليها وبتبص للنور كتير وخصوصا فى الشارع أعمدة النور أكتر حاجة بتلفت نظرها عن الأشخاص وكمان كنت بقول إن تأخرها فى المشى مقلل خبرتها ومش عارفة تكتشف حاجات جديدة

أنا كنت فاكرة إنها علشان مسحفتش الوقت ده كله إنها مش هتمر بالمرحلة دى وهتمشى على طول بس لاحظت إنها بدأت تسحف وهى عندها سنة و3 شهور ولحد دلوقتى لسة بتسحف وتطورها فى المشى بطئ جدااا وبدات تهتم باللعب بالحاجات إللى بنستعملها أكتر يعنى مثلا الموبايل أو تيليفون البيت أو زجاجة الماية وشبشب الحمام والريموت وتشد سلوك الكهربة بس كانت بتمسكهم بس وتبص عليهم يعنى محولتش مرة تحط سماعة التيليفون على ودنها أو تضغط على زرار فى الموبايل مثلا وحتى المشط تمسكه تبص عليه او تحطه فى بقها وكمان بترفض اللعب الجديدة لفترة وبعد كدة تبدأ تلعب بيهم بس لاحظت إنها مش بتلعب بيهم أكتر من إنها بتبص عليهم من جميع الإتجاهات يعنى مش بتضغط على أى زرار فى اللعبة علشان تطلع صوت مع إنها بتشوفنى وانا بضغط عليه

اختي العزيزة ....على رأي العزيزة(علوش) و كما قالت اخواتي ( اتبعي الصوت الصغير) ..لا أريد أن اصدمك ..و لكن ما قرأته هنا يشبه تصرفات ولدي بالضبط عندما كان صغيرا و هي امساك الاشياء و تدويرها و النظر لها من كل جانب دون استخدام جيد لها .

[أم عبيدة]

وفى الفترة دى لاحظت إن عينيها بيحصلها حول متقطع كدة مش دائم وعرضناها على طبيب عيون ووجد إن عندها إستجماتزم بنسبة -2,5 وعملنالها نظارة طبية وللأسف لبستها بس 10 أيام وبعد كدة بدأت تقلعها وتلعب بيها ومش راضية تلبسها أبدااااااااااااااااا مع كل المحاولات والحيل إللى مفيش مجال لشرحها دلوقتى وكنت ساعات بحس إن ضعف نظرها ده ممكن يكون مأثر عليها أو هو السبب فى إنها بتبص لإيديها كتير لأنها أوضح حاجة ليها وبتبص للنور كتير وخصوصا فى الشارع أعمدة النور أكتر حاجة بتلفت نظرها عن الأشخاص

أختي العزيزة ابني ايضا يعاني من ضعف نظر حاد و هو يرتدي نظارة طبية منذ السنة و النصف و كان تماما يحب النظر للنور في البيت و الشارع و ينظر ليديه كثيرا ...طبعا ضعف النظر حالة ليس لها علاقة بالتوحد ...أهتمي بهذه المشكلة و لا تهميليها لإن ضعف النظر يؤثر ايضا على اكتساب المهارات بصرف النظر عن التوحد من عدمه ...ابني قبل أن يرتدي النظارة أعتقد انه لم يكن يعرفني جيدا و كان يمد يده ليخرج مع اية امراءة ترتدي حجاب و لا يستطيع التفربق بين ابوه و اي رجل آخر يقود سيارة ...لم يكن يضغط على ازرار الهاتف أو الريموت و لا ينظر داخل المجلات ..كل هذه الاشياء كان يضعها في فمه فقط ...
الان و الحمد لله ..يميز بين الاشياء و يعرفني جيدا حتى أنه اذا رآنا مجتمعين مع الاهل في غرفة يجول ببصره بيننا حتى يجدني فيأتي إلي ..
عزيزتي لا تتأخري في الاهتمام بنظر ابنتك فربما لو حللت هذه المشكلة يصبح الطريق أسهل .

[أم عبيدة]

بس أكتر حاجة لفتت نظرى الأيام دى إنها أغلب الوقت بتقضيه فى تحريك إيديها وتبص ليها أو اللعب بألعاب معينة وترفض اللعب الجديدة وكمان مش بترد على النداء خاااالص حتى إنى ساعات بنده عليها أكتر من مرة متبصليش وبعدين أقولها (إرضع) مرة واحدة بس تبصلى على طول وتفرح وكمان لما قرأت إن من أعراض التوحد بعد 18 شهر إنها مش بتشاور على الأشياء وكمان مش بتلفت نظر الأم للأشياء إللى بتحبها فده صدمنى لأنى مكنتش شيفاه فيها ولأنها طفلتى الأولى كنت متخيلة إنها لسة صغيرة ولسه هتعمل الحاجات دى

اختي العزيزة ....ما ذكرتيه يشبه الى حد ما اعراض التوحد ...و لكن ما يطمئن أن ابنتك تستجيب للتعليم ...و بعدين ابنتك لسه صغيرة ..اهتمي بها اكثر ...و لاحظيها باستمرار ...و انصحك الا تتأخري في عرضها على متخصص إن لاحظت زيادة في السلوكيات النمطية أو ظهور أعراض جديدة أو ترسخ لأعراض سابقة ..
استمدي القوة من الثقة في الله ثم من اخواتك في المنتدى و انشاء الله تكون ابتنك بحال جيدة و ربي يحفظها لك .

[أختكم فى الله]

[align=justify]

اختي الفاضلة
الله يطمنك على ابنتك عاجلا غير آجل
...و النصائح اللي ذكروها لك الامهات في موضوعك الاول من ذهب ....
ورأيي من رأي الاخت ريم بما ذكرته واحساس الام وغريزتها ابرع من اي طبيب ....
والله يوفقك بالطبيب الذي يشخص الحالة تشخيص صحيح بدون تهويل او تهوين
وحتى لاقدر الله لو كان التشخيص توحد او اي اضطراب اخر ...ان شاء الله تكون الحالة خفيفة
لأن ابنتك تستجيب لتعليمك ولا تقاومه وتواصلها البصري جيد ...وهذا امر رائع جدا ...يسهل لك عملية تعليمها

ويوجد نقاط مشتركة بين حالة ابنتك وابنتي مثل عدم الالتفات لأسمها وعدم الاشارة و رفض تعلم المهارات التي تعتمد على استخدام الايدي ...وعدم النظر في يدها اثناء اداء المهارة ....وكذلك رفض اللعبة الجديدة ... فابنتي بالرغم من حبها الشديد لمشاهدة الافلام التعليمية مثل بارني ..وغيرة ....الا انه عندما نشتري شريط جديد بدل ان تنظر للتلفزيون تنظر للأرض بنظرة جانبية ...او تعلن عن غضبها بالبكاء وتقوم بحركات تفهمنا من خلالها انها تود تغيير الشريط ....

والاخصائيين شخصوا حالة ابنتي بسمات توحد .... زرت اشهر الاطباء ومراكز ذوي الاحتياجات الخاصة ...كانو يرفضو ان البنت عندها توحد او سماته بشكل قاطع وكأن اصابتها بالتوحد مستحيلة ...معتمدين في ذلك على ان التواصل البصري والاستجابة لنداء جيدين عندها ...وهم للأسف ليسو جيدين الا مع الاغراب الذين تلتقيهم اول مرة .....
ولكني تبعت احساسي وواصلت البحث والقراءة والبحث عن من يفهمني حالة ابنتي حتى وجدت اخصائي نفسي من اول زيارة قالي يبدو ان ابنتك تحمل سمات توحدية واصر انها لاتعاني التوحد وانما سمات فقط ....
بمجرد ان اكد لي شكوكي ...بدأت الحمية وبعد ان بدأتها بايام اشارت لأول مرة لبرنامج كرتوني في قناة الجزيرة للأطفال وقالت لي (فافا) اسم الشخصية الكرتونية ...وبدأت تستجيب لنداء اسمها بنسبة بسيطة .....بفضل الله

عزيزتي لم اقصد اثارة قلقك بذكر النقاط المشتركة بين ابنتي وابنتك ولكن الوقاية خير من العلاج ...وان شاء الله اجتهادك في تدريبك لها في هذا السن الصغير يقضى على اي تأخر تعانية سواء في التواصل او الاستجابة او غيره

ان شاء الله توفقي بالتشخيص السليم والطبيب المعالج البارع
ويارب ماتحتاج ابنتك أي دواء او حمية وتستطيعي مساعدتها عن طريق التدريب فقط
[/align]

جزاكى الله كل خير يا أختى على سعة صدرك وقرأة للموضوع وردك ربنا يجعله فى ميزان حسناتك
أنا بصراحة إتأكدت إن بنتى عندها سمات توحد والحكاية واضحة جداااا بس نفسى بقى أحط إيدى على المشكلة بالضبط وأعرف طريقة العلاج وأملى الوحيد فعلا إن الإصابة تكون خفيفة ومتحتاجش علاج علشان متفضلش مرتبطة بيه طول عمرها وأسأل الله أن يجرنى فى مصيبتى ويخلفنى خيرا منها
بس حبيت أسألك يا أختى إنتى إكتشفتى عند بنتك سمات التوحد وهى فى سن كام وهى دلوقتى عندها كام والحمد لله فى نتيجة وكمان بالنسبة للغة
وياترى بتاخد علاج ولا لأ وهل فعلا فى حالات ممكن متحتاجش علاج.. وبتقدرى فعلا تمشى بنتك على الحمية بدون خرقها لأى أسباب ولو حصل وخرقت الحمية بتنتكس تانى .. أنا أسفة إن أسئلتى كتير بس إستحملينى

[أختكم فى الله]

[/right]
[/right]


أختي العزيزة ابني ايضا يعاني من ضعف نظر حاد و هو يرتدي نظارة طبية منذ السنة و النصف و كان تماما يحب النظر للنور في البيت و الشارع و ينظر ليديه كثيرا ...طبعا ضعف النظر حالة ليس لها علاقة بالتوحد ...أهتمي بهذه المشكلة و لا تهميليها لإن ضعف النظر يؤثر ايضا على اكتساب المهارات بصرف النظر عن التوحد من عدمه ...ابني قبل أن يرتدي النظارة أعتقد انه لم يكن يعرفني جيدا و كان يمد يده ليخرج مع اية امراءة ترتدي حجاب و لا يستطيع التفربق بين ابوه و اي رجل آخر يقود سيارة ...لم يكن يضغط على ازرار الهاتف أو الريموت و لا ينظر داخل المجلات ..كل هذه الاشياء كان يضعها في فمه فقط ...
الان و الحمد لله ..يميز بين الاشياء و يعرفني جيدا حتى أنه اذا رآنا مجتمعين مع الاهل في غرفة يجول ببصره بيننا حتى يجدني فيأتي إلي ..
عزيزتي لا تتأخري في الاهتمام بنظر ابنتك فربما لو حللت هذه المشكلة يصبح الطريق أسهل .

أنا والله مش مهملة خالص معاها فى لبسها للنظارة بس هى فعلا لبستها 10 أيام متصلين بس بدأت بالتدريج تخلعها وتلعب بيها وبعدين بقى مستحيل تسيبها لحظة على وجهها لدرجة إنى جبتلها نظارة تانية تلعب بيها غير نظارتها بقت ترمى إللى فى إيديها وتخلع إللى على وشها وكمان ربطهالها بأستيك مرة وبحبل مرة وأحيانا كانت تكتفى بإنها تشدها بس وتفضل متعلقة فى رقبتها وخلاص بصراحة الموضوع ده تعبنى جداااا وكان هو همى الوحيد قبل موضوع التوحد ده بس إنشغلت عنه دلوقتى فى التفكير .. فياريت تنصحينى وتقوليلى لبستى أبنك إزاى النظارة فى السن ده وقوليلى أى حيلة أو أى إختراع أعمله علشان تفضل لبساها ويكون ليكى جزيل الشكر