الاحصائيات المتقدمة

تقليص

إعـــــــلان

تقليص
لا يوجد إعلان حتى الآن.

أرجو المساعدة من الأخت الفاضلة نهى عزت ومن لديه الخبرة

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • Font Size
    #1

    أرجو المساعدة من الأخت الفاضلة نهى عزت ومن لديه الخبرة

    السلام عليكم ورحمة الله وبركاته
    أنا بنتى عندها سنة و10 شهور وعندها سمات توحد...... وحتى الأن لم أستقر بعد على طبيب للمتابعة عنده أو مركز ألحقها بيه
    وفى الفترة دى أنا عايزة أنا إللى أدربها علشان أستفيد بالوقت ... فقرأت كتير وبحثت وإستفدت من بعض الأخوات وإللى توصلتله حتى الأن
    إنى بالنسبة لتنمية المهارات شوفت مهارات العام الأول وإيه إللى ناقصها فيه وبحاول أدربها عليه مهارة مهارة بالتدريج
    وبالنسبة للتخاطب عرفت من أحد الأخوات إنها فى السن ده محتاجة تعرف الأول أجزاء جسمها
    وكمان أعملها تنشيط حواس فاستفدت من الأخت أم محمود وعملتلها مخدة الإحساس إللى جمعتلها فيها أنواع كتير من الأقمشة مختلفة الملمس ومن المعادن

    حابة أسأل هل أنا كدة ماشية صح
    وكمان عندى مشكلة
    أنا عايزة أعمل لبنتى 40 ساعة فى الأسبوع
    ومش عارفة أرتبهم إزاى
    والمشكلة التانية
    إن بنتى بتزهق بسرعة جدااااااااا ........ يعنى بالنسبة لتنمية المهارات بعلمها إنها تأخذ مكعب من علبة وبعدين تضعه فى العلبة تانى بناء عن أمر لفظى
    بس هى بتاخذه على طول وأنا لازم أساعدها علشان تضعه فى العلبة وبشجعها وأسقفلها وكمان هى بتسقف لما بشجعها وبتكون فرحانة بس يادوب 5 دقائق أو عشرة بالكتير وبتزهق وبتعيط ....... ومش عارفة فى الحالة دى أضغط عليها ولا أسيبها شوية وبعد كدة أكمل ..ولا أدربها على شئ تانى ممكن يكون ممتع بالنسبة ليها
    يعنى مش عارفة إزاى أعمل معاها ساعة تنمية مهارات وهى بتزهق من أول 5 دقائق

    وبالنسبة للتخاطب هل ينفع معاها فى السن ده الصور ولا المجسمات أفضل
    وكمان هى بتحب الكمبيوتر وممكن تقعد ساعة تتفرج على فيديو تعليمى هل أستفيد من الشئ ده ولا غلط ....... يعنى لما بشغلها فيدو فيه أسماء الحيوانات وأصواتها بتكون فرحانة جداااا وأحيانا بتقلد صوت الحيوان وكمان بتنطق حروف من إسم الحيوان وانا بلاحظ عليها من زمان إن تكرار أى فيديو قدامها بتحفظ منه حاجات كتير
    وهل ده ينفع كجلسة تخاطب وانا كمان أبقى أكمل معاها بنفسى فى مواضيع أخرى

    وكمان لما أعلمها أجزاء جسمها ... أبدأ بكام جزء وأنتقل لغيره إمتى

    وبالنسبة لتعديل السلوك هى مش بترد على اسمها ومش بتشاور على الأشياء

    فأنا محتاجة منك أختى نهى تساعدينى وتحطيلى جدول متوزع فيه التخاطب والمهارات وتعديل السلوك وتنشيط الحواس على 5 ساعات يوميا على الأقل وفى حالة إنها تزهق وتضايق أنا المفروض أعمل إيه ..... يعنى أنا مش متوقعة إنها هترضى تقعد معايا ساعة علشان أعلمها حاجة وخصوصا إنها بترفض إنى أعلمها حاجة وخصوصا لما تكون هتستخدم إيديها ....فى التخاطب ممكن تقعد وقت أطول وتسمعنى وتبص على شفايفى وبتحاول تحركها وكمان بتحب الصور
    إنما إستخدام إيديها صعب وبترفض وكمان لما بحاول أحط إيديها على المخدة إللى أنا عملاها بترفض وبتشد إيديها وخصوصا لما يكون ملمس الشئ خشن أو غريب عليها ... هل أتجاهل رفضها ده وأضغط عليها لحد ما تتعود ولا أعمل إيه

    انا عارفة إن أسئلتى كتيييييييير جدااااااااا بس أنا أملى إنك تساعدينى لأنى مشتتة ومش عايزة أضيع وقت وعايزة أرتب أمورى علشان ألتزم بيها
    أنا منتظرة ردك يا أختى

  • Font Size
    #2
    رد: أرجو المساعدة من الأخت الفاضلة نهى عزت ومن لديه الخبرة

    السلام عليكم ورحمه الله وبركاته
    فى البدايه الله يبارك فيكى وفى طفلتك وعلى مجهودك معاها
    ثانيا من الواضح ان معلوماتك كثيره جدا من خلال كم المعلومات التى قراتيها ولكن انك ترغبين فى تعليمها لطفلتك كلها مره ودفعه واحده وهذا خطا لكن الصح هو ان تفهمى اولا قدرات طفلتك فكل طفل مختلف عن الأخر كل الذى قراتيه ممتاز جدا لكن اين قدرات طفلك فيه ومستوى استيعابها حاولى الاول ان تطعى نفسك مكان طفلتك وشوفى درجه استيعابها ازاى ابدائى الاول بعمل قرب لطفلتك منك فقد يكون رفضها لسجاده الملامس هو راجع لرفض مبدا المس اصلا وهذا يحتاج تدريب الاول قبل عرضها على لوحه الملامس وكم الساعات التى ترغبين فيه الان هو كثير جدا ليس بالكم ولكن بالاستفاده فممكن ان تجلسى مع ابنتك ساعه واثنين ولم تستفيد شئ وممكن تجلسى ربع ساعه وتستفيد كل شئ عن هدف واحد وهكذا مع كل هدف الموضوع ليس صعب ولكن المهم هو فهم قدرات طفلتك والتعامل معها كما هى ثم نطوعها كما نرغب نحن بالتدريج ولكم ان نبدا من تحويلها الى قدراتنا نحن خاصه مع الاوتيزم او الملامح صعب قلايلا حاولى تركيزى فى فهم قدرات ابنتك لمده ثلاث ايام بان تلاحظ تصرفاتها بدقه كامله جدا جدا جدا ثم تحاولى النظر على عينها باستمرار وتلاحظى توجها لفين وما الذى تركز عليه وكيف تراه وما هو طريقه تفكيرها له ومن انه وجه نظر تراه قد تكون افضل مننا وقد تكون خطا حاولى تقربيها لحضنك وشوفى رد فعلها ايه كذلك لمسها والتعامل معها عن طريق جسمها بان تلمسى يدها شعرها رجله ظهرها ولاحظى رد الفعل فيها
    حاولى ان تنزلى بمخك لبنتك اولا صدقينى حتقربى ليها اوى وحتحسى بقدراتها وحتعرفى هى محتاجه ايه الاول. ثم بعد ذلك حدثينى عن قدرات طفلتك من الزاويه التى شفتيها منها وبعد ذلك نبدا برنامجنا عموما اى عمل مع الاطفال يبدا بتقيم لقدرات الطفل اولا وهذا الذى سوف تعمليه انتى خلال الثلاث ايام ويفضل كتابه ملاحظاتك فى كراسه وكل تصرف تلاحظيه عليها سجليه على مدار الثلاث الايام حتى تتاكدى منه

    اختيارنا للثلاث ايام المقصود منه هو ملاحظه السلوك ثلاث مرات حتى نكون خرجنا من دائره الصدفه والظروف ويكون السلوك براحته دون قيود
    منتظراكى
    لا حول ولا قوه الا بالله
    سبحان الله العظيم وبحمده
    سبحان الله والحمد لله ولا اله الا الله والله اكبر
    سبحان الله وبحمده زنه عرشه
    اللهم اغفر للمسلمين والمسلمات والمؤمنين والمؤمنات الاحياء منهم والاموات الى يوم يقوم الحساب
    حسبى الله الذى لا اله الا هو عليه توكلت وهو رب العرش العظيم

    تعليق


    • Font Size
      #3
      رد: أرجو المساعدة من الأخت الفاضلة نهى عزت ومن لديه الخبرة

      [align=right]جزاكى الله كل خير أختى نهى على الإهتمام والرد السريع
      على فكرة إنتى ممكن تاخدى فكرة عنى إنى متسرعة بس انا عايزة اقولك إن بقالى 3 شهور مش 3 أيام حاطة بنتى تحت مراقبة دقيقة جدااااا جدااااااا لأنى كنت غيرت أسلوب حياتنا معاها وتعاملنا وكنت عايزة أشوف الفرق وفعلا الحمد لله فرق كتير وشوفت عند بنتى قدرات كانت مستخبية وكمان اكتسبت كلمات جديدة وأقدر أقولك مميزات وعيوب بنتى بالضبط وبثقة

      أولا بالنسبة للإحتضان واللمس هى معندهاش مشاكل معانا ولا مع أفراد الأسرة المقربين وأغلب الوقت بتكون فى حضنى وفى حضن والدها وبتكون مبسوطة جداااا ...... بس أنا بلاحظ عليها إنها بتكون مترددة أغلب الوقت فى لمس الأشياء إللى حواليها الغير معتادة عليها وبدأت تتجراأ بتدريج بطئ فى لمس الأشياء وحملها عن الأول بس مازالت بحسها مترددة أحيانا .. وبالنسبة لمخدة اللمس انا كنت متوقعة رفضها بس مش عارفة أتعامل معاه إزاى

      بالنسبة للتفاعل الإجتماعى الحمد لله طبيعى بالنسبة للى فى سنها وبيزداد كمان بالإختلاط وكمان ماشاء الله تواصلها البصرى جيد جداااااااا مش بتزيح وجهها إلا إذا كانت زهقانة أو حاسة بالملل وعايزة تروح لمكان آخر

      بدأت توظف بعض الكلمات كمثال لما بباها يدخل من الباب تقول (عليكم) قبل ما باباها يقول السلام عليكم ...... ولما نمشيها فى البيت بتقول (تاتا) وكمان ولو شاورتلها بإيدى بمعنى لأ من غير ما أتكلم ألاقيها بتقول (لأ)...... وكمان أنا عودتها قبل ما ننام أقرألها المعوذتين .. وبعد يومين بالظبط من الحكاية دى لاقيتها أول ما دخلنا غرفة النوم بتقول (الناااااااس) وإن شافت أناشيد فى التيليفزيون هى عرفاها حتى لو كان صوت التيليفزيون مقفول ألاقيها بتنطق كلمات منها ... ولو غنيتلها أنا بعض الأغانى وتوقفت عند كلمة معينة ألاقيها بتكملهالى ........ وأشياء كتير من هذا القبيل
      بس مشكلتها بقى فى اللغة إنها مش بتستخدمها فى التعبير عن نفسها يعنى مش بتطلب ماية ولا اكل تبكى بس ومش بتحاول تقول هى عايزة إيه ومش بتشاور, بس ممكن تعبر بحركات ... يعنى لما تكون عايزة تنام تيجى تقعد على رجلى وتنام فى حضنى وتطبطب على نفسها علشان انا أطبطب عليها ..الشئ الوحيد إللى بتعبر عنه وتطلبه لما تكون عايزة تمشى لأنها مازالت بتمشى بمساعدة , ألاقيها بتمسك إيدى أو إيد والدها وتقول تاتا تاتا....... وكمان فهمها للغة بسيييط جداااا يعنى أوامر بسيطة وبتنفذها كمثال كلمة (لأ) أو (كخ) (هاتى حضن) (تعالى) (هاتى بوسة) (إعملى باى) (صلى) كلمات أغلبها مفردة بس مش بتفهم ... بابا فين جدو فين ... خدى هاتى وباقى اللغة بحس إنها غالبا مش فهمانى وكمان أغلب الوقت بتتكلم لغة غير مفهومة وأحيانا بتوجها لينا او بتكلم نفسها قدام المرايا وبحس كأنها بتشرح موضوع وبتحرك إيديها وراسها وكأنها بتحكى عن شئ معين بس اللغة عبارة عن حروف غير مفهومة

      وكمان بتقلدنا فى حاجات كتير وخصوصا طرق لعبنا معاها وكمان بتقلدنى فى الصلاة وبتقلد حركات الفم والرقبة وأصوات الحيوانات وأصوات الماكينات وأصوات العطس والتثاؤب والضحك والكحة بس بتقلدنا فى الحاجات إللى هى حباها يعنى متنفعش تقلدنى بالأمر أو تكون أول مرة أعملها حاجة وأطلب منها تقلدها لازم تكون حاجة شافتها أكتر من مرة

      وبالنسبة لطرق لعبها محيرة .أحيانا تلعب باللعبة صح واحيانا نفس اللعبة تحطها فى بقها أو تقلبها والعرائس خاصة بتحبها ودايما تمسكها وتبصلها وتتكلم معاها بلغة غير مفهومة وأحيانا بلاقيها بتلاعبها زى ما إحنا بنلعب معاها ... بس مشكلتها فى اللعب إللى فيها أزرار مش بتحب تعتمد على نفسها وتضغط على الأزرار .. موبايلى بس إللى بتضغط عليه لما الفيديو يخلص وتكون عايزة تعيده ... بس لو جبتلها موبايل لعبة مش بترضى تضغط على ازراره وبتكون محاولات مترددة .. ولما بحاول أمسك إيديها وأساعدها أحيانا بتستجيب بسهولة وأحيانا بترفض بشدة وكمان بحس إن معندهاش تآذر بصرى لو حاولت تضغط لوحدها صوباعها بيروح بعيد عن الهدف

      بالنسبة للمهارات تقريبا أغلب مهارات العام الأول ما زالت مش بتعرف تعملها وخصوصا إللى بالمكعبات وكمان لأنها متأخرة فى المشى لحد دلوقتى وبنعملها علاج طبيعى وفى تقدم الحمد لله فأنا حاسة إن تأخر مشيها من ضمن الأشياء إللى مأثرة عليها ومخلياها مش عندها خبرة زى إللى فى سنها ومأخرة تقدمها العقلى .. أنا بحس إنها بتستجيب فى مجال التخاطب والكلمات أكتر والأفعال المصحوبة بكلمات زى( باى ولأ وصلى ) إنما اللعب والمهارات إللى بإيديها بترفض إنها تتعلمها وكمان بتمل بسرعة جدا ومتقلبة المزاج وأحيانا بتسرح مع إن تواصلها البصرى كويس جدااا ما شاء الله وأحيانا مش بتنتبهلى وأنا بعلمها وتبص لإيديها وتتكلم كلام غير مفهوم وتتجاهلنى
      مع إنها معندهاش فرط حركة الحمد لله بس هى عصبية جداا بس الحمد لله مش عدوانية ولا بتأذى نفسها بالعكس بتخاف على نفسها جدااا
      إحساسها بالألم طبيعى جدااا مش معدوم ولا مبالغ فيه
      بالنسبة لمشاكلها السلوكية ..... هى إنها مش بترد على النداء وكمان مش بتشاور ومش بتفهم الإشارة ..... وكمان بتحط كل شئ فى فمها وبدأت تهتم بشعرى اليومين دول وتحب تلمسه وتشده طبعا برفق مش عدوانية .. وبتحب تشوف نفسها فى المرايا جدااا وكمان مهتمة بخيالها إن لاحظت خيالها فى أى مكان بتقعد تعمل حركات بإيديها وتتفرج على خيالها وغالبا إيديها لما بتكون فاضية بيكون فى صوباعين لمسين بعض وخصوصا لما بنكون فى الشارع مع إنها بتحب الخروج جداااا وتغير الجو ..
      ومش بتحب العزلة ولا الروتين وبتحب الأطفال وبتبصلهم وتضحكلهم وبتكون فى أحسن أحوالها لما تكون فى مجموعة وخارج المنزل

      أرجو إنى مكونش قصرت فى الشرح .. وأرجو كمان إنى مكونش إتكلمت بزيادة ....... بس حبيت أنقلق كل ملاحظاتى بالتفصيل .. أنا عارفة إنهم كتير وكمان فيها متناقضات أرجوكى خذى وقتك فى دراستها ... وقوليلى إيه المطلوب بالضبط وأنظمه إزاى وهى محتاجة وقت قد إيه واتعامل معاها إزاى ... ويارب مكونش تعبتك معايا[/align]

      تعليق


      • Font Size
        #4
        رد: أرجو المساعدة من الأخت الفاضلة نهى عزت ومن لديه الخبرة

        السلام عليكم بارك الله فيكى
        وعلى اهتمامك بطفبلتك وطول هذه المده فى ملاحظتها بجد ربنا يباركلك

        بالنسبه
        1- للمس :- فلمس الاشياء الغريبه امر طبيعى ان يكون شئ مقلق بالنسبه لها لكن مع ملاحظته ومعرفته انه غير مضر لها تبدا فى لمسه بشكل جيد فهذا لا يقلقك نهائى.
        2- التفاعل الاجتماعى فهذا ممتاز جدا ويطمئنا.
        3- بالنسبه للغه هناك مؤشر جيد انها تستخدم بعض المفردات التى تحتاجها وتعجبها للدلاله على شئ او حدث معين فمعنى انها تستخدم كلمه تاتا للتعبير عن المشى لما بتريد فانها تقدر على استخدام كلمه اكل او مم او اشرب لما تريد ولكنها استسهلت الاشاره والبكاء فنحاول اضافه الكلمات للفعل المناسب وعدم الاستجابه للفعل بل نتجاهله ونقول لها انه اسمه ( مم - امبو - اشرب .......) ونصر على ذلك حتى نعدل لها هذا السلوك .وممكن نتدخل الكلمه ( مم - اكل ) فى جمله او قصه ما بهدف انها تقولها فقط .
        4- معنى انها تنفذ التازر على موبايلك لتشغيل الفيديو بمفردها فمعنى ذلك ان التازر لديها جيد وهى تعرف ان اللعبه التى فى يدها هى لعبه وليست مجرد حقيقه فبالتالى لا تشد انتباها .
        5- طرق لعبها مختله لانها تريد اكتشاف العبه التى تمسكها فمره بالفم ومره باليد ومره بعينها وغيرها من الطرق وكون انها تكلم العروسه باسلوب غير مفهوم معنى ذلك انها تستخدم اللغه مع الشئ الذى يفهمها وهى العروسه فالعروسه هى عالمها التى لا تجد صعوبه فيى التواصل معه بل يكون بكل سهوله وهذا امر طبيعى للى فى سنها

        واضح من كلامك ومن كل ملاحظاتك ان طفلتك محتاجه مش حنقول تعديل سلوك ولكن تعديل بعض المفاهيم الخاطئه عندها وفهم شخصيتها اكثر فهى لها شخصيتها التى لا ترغب فى دخول شخص فيها بدون اذن منها ولكن بمزاجهل فكل الى انتى علمتيه ايها جميييييييييل جدا ورائع وفوق الممتاز وكملى زى ما انتى عليه لكن مع عمل مرونه فى الهدف فعندما لا ترغب فى عمل شئ انتى عاوزاها تعمله فكرى فى طريقه ( لف ودوران حول الهدف) حتى تعمله كما انتى عاوزه وعندما تلاحظى انها تعمله لا تلفتى نظرها انك تراقبيها واتركيها بحريتها
        ربنا يوفقك ومنتظراكى
        لا حول ولا قوه الا بالله
        سبحان الله العظيم وبحمده
        سبحان الله والحمد لله ولا اله الا الله والله اكبر
        سبحان الله وبحمده زنه عرشه
        اللهم اغفر للمسلمين والمسلمات والمؤمنين والمؤمنات الاحياء منهم والاموات الى يوم يقوم الحساب
        حسبى الله الذى لا اله الا هو عليه توكلت وهو رب العرش العظيم

        تعليق


        • Font Size
          #5
          رد: أرجو المساعدة من الأخت الفاضلة نهى عزت ومن لديه الخبرة

          جزاكى الله كل خير أختى نهى ردك أرحنى كتير وشجعنى وبصراحة أنا شايفة نفسى لسة معملتش أى مجهود كل إللى أنا عملته من حوالى 3 أشهر إنى غيرت الروتين إللى كانت عايشة فيه أو بمعنى أصح إللى كلنا كنا عايشين فيه وغيرنا أسلوبنا فى التعامل معاها فكانت النتائج كويسة الحمد لله
          أما أنا دلوقتى كنت ببحث عن مركز ألحقها بيه علشان التدريب بس للأسف إتضحلنا إنه مش كويس مش بالمستوى المطلوب ومش هو المكان إللى ممكن أطمن على بنتى فيه وخصوصا إنها مازالت صغيرة وممكن يجهلوا طريقة التعامل معاها ....... فعلشان كدة حسيت إنه لا مفر من إنى أقوم أنا بدور المركز مع الإستمرار طبعا فى أسلوب حياتنا المعتمد الأن على تنمية كل شئ فيها وإصلاحه إن شاء الله
          فكنت محتاجه أعرف منك إزاى أقوم بدور المركز معاها ....... وبالأخص من ناحية تنمية المهارات , لأنها زى ما ذكرت معظم مهارات الطفل فى عامه الأول مش بتعرف تعملها أو مش عايزة تعملها ...... فمش عارفة أتعامل معاها فى النقطة دى إزاى هل أخصصلها وقت ولا أقوم بيها فى فترات متقطعه على مدار اليوم علشان متملش وفى حالة رفضها لمهارة معينة لمدة طويلة هل أتركها وأشوف مهارة أخرى وحابة إنك تدينى مثال عن طريقة اللف والدوران حول الهدف ...... يعنى بالنسبة لمهارة إنها تأخذ مكعب من علبة ثم تضعه تانى فى العلبة ممكن ألف وأدور عليها إزاى فى شئ زى ده لو رفضت تعمله
          وعندى فكرة عايزة آخد رأيك فيها .. هل ممكن أصورلها المهارة فيديو وأسيبها تشاهدها فترة بما إنها بتكون مركزة فى مشاهدة الفيديو أكثر من مشاهدتى وبعد كدة أقوم بتدريبها عليها ؟

          أما بالنسبة للمس هل تقصدى إنى محاولش أضغط عليها وهى بالوقت هتتطور فى الحكاية دى

          أما بالنسبة للغة هل أخصصلها وقت ولا أخليها على مدار اليوم فى صورة شرح مبسط ومتكرر لأحداث اليوم ....... أم إنها محتاجة للتركيز على كلمة أو كلمتين لفترة حتى إتقانها وهل إستخدام الصور فى السن ده كويس وخاصة إنها بتحب الصور

          بالنسبة لطريقة لعبها أنا عارفة إنها إن شاء الله ممكن تتصلح لما أشاركها فى اللعب وتعرف اللعب دى بتتلعب إزاى
          وانا فعلا شوفتها بعض الأحيان بتضغط على أحد أزرار لعبتها وفجأة تجرى وكأنها عملت جريمة مع إنها متعرفش إنى شوفتها .. بحس ساعات إنها بتعرف تعمل كل حاجة صح بس فى شئ جواها بيمنعها او بيحرضها إنها متعملش كدة ومش عارفة أتغلب على المشكلة دى إزاى

          وهل فى طريقة اتغلب بيها على لغتها الغير مفهومة إللى بتتكلم بيها أغلب الأوقات ولا هى هتقل مع الوقت

          وشكرا لنصايحك الثمينة وإن شاء الله هستخدم المرونة معاها ........ بس انا محتاجة أعرف إزاى أفيدها أكبر إفادة أنا عايزة أستفيد من سنها الصغير قدر الإمكان ومش عايزة أضيع وقت فى البحث عن مركز إللى من الواضح إنى مش هلاقيه ...... فعايزة أعرف منك فى سنها ده إزاى أقوم بدور المركز معاها وأفيدها أكبر إفادة مستطاعة مع طبعا عدم التقصير إن شاء الله فى دور الأم ومساعدتها فى تعديل المفاهيم الخاطئة عندها زى ما نصحتينى

          أرجوكى إستحملى أسئلتى الكتير واستفساراتى ومنتظراكى يا اختى

          تعليق


          • Font Size
            #6
            رد: أرجو المساعدة من الأخت الفاضلة نهى عزت ومن لديه الخبرة

            [align=justify]
            بالنسبه للف والدوران حول الهدف فممكن كمثال هدف اخذ مكعب او وضع مكعب بداخل علبه ممكن بدل المكعب اختارى خياره او اى شئ تحبه كتوكه او شراب جوا درج او مشبك جوا علبته فلوس جوا جيبها او اى شئ من هذا القبيل اختار طريقه تستخدمى فيها اى شئ تحبه وضعيه فى الهدف .

            ممكن تصورى الهدف او تعمليه انتى الاول حاولى نوعى فى الطريقه لانى اتمنى ان تاخذ منك انت الامر وهذا سوف يظهر لكى فيما بعد من المهارات

            بالنسبه للمس ما سوف تبدا بمسك الاشياء والعمل معكى اتركيها قليلا ثم ندخلها فيما بعد تدريبات المس باسلوب غير مباشر

            بالنسبه للغه فمثلا اليوم نتعلم كلمه مم ( مثلا) فممكن ان انها تساعدك فى المطبخ وتحضر اى شئ حتى ولو غسيل فاكهه ( فمنه لمس الماء - الاحساس بابرود الماء - فهم معنى الخيار - ادراك لون الخيار - ادراك رائحه الخيار - مع اصطحاب الكلمه بالفعل فمثلا اليوم مريم عملت لنا مم خيار - احنا انهارده حناكل ممممممم خيار ) وهكذا مع باقى الكلمات التى ترغبين تعليمها اياها.

            بعض اطفالنا لا يظهرون فعل الشئ امام الاخرين حتى يدركوا هم الاول ثم يخرجوا لنا فيما بعد بعد التاكد منه

            كى تحققى دور المركز من الصعب قليلا ان تبدائى بخمس او ثمن ساعت يوميا فابدائى بالزياده تدريجيا اولا ابدائى بتضبط مواعيد نومها وصحيانها مبكرا واجعلى بعد ايقاظها ساعه عمل عمل ثم وجبه خفيفه ثم ساعد اخرى حركيه او لغويه او اى كانت حتى لا تمل منكى

            بانسبه للاسئلتك واستفساراتك فانا سعيده بها جدا وارجوكى لا تبخلى على باى اسئله او استفسار فانتى اكيد توفرى الطريق على الكثير من الامهات وتجيبين عن اسئلتهم الكثيره التى لا يعرفون كيف يسئلونها .


            شكرا لكى مره اخرى
            [/align]
            لا حول ولا قوه الا بالله
            سبحان الله العظيم وبحمده
            سبحان الله والحمد لله ولا اله الا الله والله اكبر
            سبحان الله وبحمده زنه عرشه
            اللهم اغفر للمسلمين والمسلمات والمؤمنين والمؤمنات الاحياء منهم والاموات الى يوم يقوم الحساب
            حسبى الله الذى لا اله الا هو عليه توكلت وهو رب العرش العظيم

            تعليق


            • Font Size
              #7
              رد: أرجو المساعدة من الأخت الفاضلة نهى عزت ومن لديه الخبرة

              أختكم في الله كيفك أن شاء الله تكو ني بخير اريد ان اسألك هل اكدو لكي ان ابنتك لديها توحد وهل عملو لها مقياس وهل الدكتورالذي ذهبتي بابنتك له وقال ان لديها توحد دكتور ممتاز؟ ارجو الأجابه لأنه من كلامك لم يتضح لدي إي علامات التوحد فالطفلة اجتماعية لديها تواصل بصري جيد حتى اللغة اعتبرها مناسبه إلى حدما وحتى وأن كان لديها تأخر فهو ليس دليل قطعي أومعيار على أن لديه توحد ارجو الرد؟

              تعليق


              • Font Size
                #8
                رد: أرجو المساعدة من الأخت الفاضلة نهى عزت ومن لديه الخبرة

                السلام عليكم ورحمة الله وبركاته
                أختى نهى جزاكى الله كل خير وجعله الله فى ميزان حسناتك وإن شاء الله أنفذ نصايحك
                وهى فعلا بنتى محتاجة تنظيم نوم . عايزة أركز معاها شوية فى تنظيم نومها إن شاء الله

                وعلى فكرة أنا صورت المهارة إللى كنت عايزة أعلمهلها على الموبايل مع الشرح بصوتى طبعا
                يعنى كنت بمسك المكعب وأحط العلبة قدامى وأقول ( خوديه ... حوطيه جوه ) مع الفعل وأكرره
                وبعدين شغلته ليها وإديتها الموبايل وحطيت جمبها العلبة والمكعب وبعدين وقفت بعيد .. فلاحظت إنها تبص فى الموبايل وبعدين تبص على العلبة جمبها وتضحك وتمد إيديها فى العلبة وبعدين تطلعها تانى وتبص فى الموبايل وسعيدة جدااا
                وكمان شغلتلها الفيديو فى يوم تانى على التليفزيون وحطيت جمبها العلبة والمكعب .. لاقيتها أخدت المكعب من العلبة ورمته بره وبعدين مسكت العلبة مع إنها كانت رافضة تمسكها خالص وفضلت تدخل إيديها جوه العلبة بس من غير مكعب ... أنا عارفة إنها معملتش المهارة صح .. بس حاسة إنه تجاوب كويس
                وطبعا انا مش متجاهلة إنى لازم أقوم بنفسى معاها بالتمرين وده انا بعمله .. بس انا كنت عايزاها تركز شوية فى الفعل نفسه وهى مبسوطة علشان يثبت فى دماغها لأنها ساعات وانا بعلمها بتعيط ومش بتبصلى اصلا وأنا ماسكة إيديها

                وكمان النهاردة حصل موقف حلو أوى .. كنت عند والدى ووالدتى وبعد فترة زهقت وبدأت تعيط فشغلتلها الفيديو على الموبايل وإيدتهولها بس كنت قافلة الصوت علشان كنت بتكلم مع امى ... فلاقيتها لما شافت صورة المكعب قالت (كعب) ولما حطيت المكعب جوه العلبة قالت (جوووه) وكررتها مع كل مرة أدخل المكعب فى العلبة .. إيه رأيك فى الموقف ده

                إن شاء الله أحاول أنظم وقتى معاها وهقولك إن شاء الله على كل التطورات

                أختى شاطئ الأمل شكرا على المشاركة والإهتمام
                أنا فعلا يا أختى قبل ما أعرض بنتى على دكتور كنت محتارة جدااا معاها .. لأنها عندها بعض سمات التوحد .. إنها مش بترد على النداء ومش بتشاور ولا تفهم لغة الإشارة وكمان لا تفهم اللغة العادية زى إللى فى سنها
                وفى نفس الوقت فيها أشياء عكس التوحد زى إللى إنتى ذكرتيها فكان أملى إنها لو عندها توحد هيكون إن شاء الله سمات بسيطة أو توحد بسيط .. لأن حتى الأخوات إللى أبناءهم عندهم توحد بسيط كنت بحس من كلامهم إن بنتى حالتها أفضل من كدة
                المهم روحت لدكتور مشهور ويقال إنه ممتاز فى هذا المجال .. بس للأسف إتضحلى فيما بعد إنه الموضوع بالنسباله تجارى
                وتخيلى يا أختى التشخيص كان بالنسبالى صدمة (توحد شديد جدااااا كلاسيكى وتأخر عااااام) بصراحة صعقت ومن كثرة مبالغتهم فى حالة بنتى خلونى مش مصدقة أى كلمة بيقولوها حتى وإن كانت صدق لأن من قرآتى لمواضيع كتير فى المنتدى وأسئلتى الكتير للأمهات هنا كلهم طمنونى إن بنتى إن شاء الله تكون حالتها بسيطة وفى منهم إللى قالى إنه شاكك إن بنتى معندهاش توحد زى ماقولتى وكمان التوحد الكلاسيكى انا أعرف عنه بعض المعلومات مش شايفاه فى بنتى خاااالص .. طبعا رجعت من عند الدكتور بصدمة وفقدان ثقة فى كل الأطباء .. وإن شاء الله حجزنا عند دكتورة بعد شهر وربنا يقدرلنا الخير
                ولو عايزة تعرفى زيارتى للطبيب الأولى والثانية بتفاصيل أكتر ممكن تدخلى الموضوعين دول وطبعا يهمنى أعرف رأيك فى حالة بنتى أولا وفى الدكتور ثانيا
                دى الزيارة الأولى
                السلام عليكم ورحمة الله وبركاته أنا عارفة إن مشاراكاتى قليلة وأغلبها أسئلة ومش بفيدكم بحاجات كتير بس انا لسة برده معلوماتى ضئيلة بالنسبة لمعلوماتكم ومازلت فى مرحلة البحث بس انا تقريبا كل يوم بتابع كل جديد عندكم ودائما بدعيلكم إنتوا وأولادكم بظهر الغيب ربنا يجعل دعائى من نصيبكم وأشهد الله العظيم إنى أحبكم فى الله وادين لكم

                ودى الثانية
                السلام عليكم ورحمة الله وبركاته جزاكم الله كل خير جميع الأعضاء إللى نصحونى فى موضوعى إللى فات عن الزيارة الأولى وأكيد نصائحهم فرقت معايا هحاول ألخصلكم زيارتى الثانية للدكتور إللى كان فيها إختبار تنمية المهارات والجلسة مع الدكتور لوضع خطة العلاج وزى ما قولتلكم فى زيارتى الأولى كانت تعليقات الدكتور حسين عبد الدايم على بنتى

                تعليق


                • Font Size
                  #9
                  رد: أرجو المساعدة من الأخت الفاضلة نهى عزت ومن لديه الخبرة

                  اختي كيفك لا بد لكي من زيارة طبيب أخر ولكن أنا متفائله جداَ لانه مر علينا في المراكز مثل حالات بنت واتضح فيما بعد انها طبيعية ولكن لا أجزم لك لا بد لك من زيارة الطبيب واتمنى ان نسمع اخبار سعيده عموما أختي خبرينا عن النتائج .
                  اتمنى الشفاء العاجل لأبنتك

                  تعليق


                  • Font Size
                    #10
                    رد: أرجو المساعدة من الأخت الفاضلة نهى عزت ومن لديه الخبرة

                    شكرا أختى شاطئ الأمل وجزاكى الله كل خير وربنا يستجيب منك ..... يعنى أفهم من كلامك إن حتى لو بنتى مش طبيعية فهى إن شاء الله حالتها بسيطة وفى أمل كبير إنها تتحسن مع كل المشاكل إللى عندها دى

                    تعليق


                    • Font Size
                      #11
                      رد: أرجو المساعدة من الأخت الفاضلة نهى عزت ومن لديه الخبرة

                      أن شاء الله استمري في متابعتها بإذن الله تسمعي اخبار كويسه

                      تعليق


                      • Font Size
                        #12
                        رد: أرجو المساعدة من الأخت الفاضلة نهى عزت ومن لديه الخبرة

                        منكلامك عن ابنتك انا اشوف انها طبيعية وعندها تأخر بسيط جدااااااا ... ولكن مع علاجها السلوكي وتعزيز مهاراتها ممكن انها تتطور وتصبح طبيعية جداااااا ..

                        اتمنى لها الشفاء العاجل ...

                        تعليق


                        • Font Size
                          #13
                          رد: أرجو المساعدة من الأخت الفاضلة نهى عزت ومن لديه الخبرة

                          السلام عليكم ورحمة الله وبركاته اختى ام محمد تكلمت مع الاخت نبراس مديرة معهد التوحد و اخصائيه التوحد عن حالت ابنك و استدعيته الى المنتدى و هيه سجلت معنا واعطيتها رابط موضوعك و ممكن تساليها و تستفاد منها ان شا الله اخوكى م شيواو

                          لديّ ذَاكِرَة لَا تَغفَل أيّ مِن أحدَاثِي السيّئَة ، وليَ قَلب يغفِر لـ. مُسيئِيه بـ سهُولة ..
                          ومَابينَ رُؤيتِي لوجُوه آذتنِي و إستشعَارِي أنّهم لا يستحقّون المغفرَة .. . تحترِق ذَاتِي !
                          ثَمّة أشْخَاص نَخْشَى عَليْهِم مِن الانْكِسَار لِفرْطِ محَبّتنَا لهم ،
                          فَـ نُفَاجَأ بِهم وَ قَدْ كَسرُونَا . .

                          تعليق


                          • Font Size
                            #14
                            رد: أرجو المساعدة من الأخت الفاضلة نهى عزت ومن لديه الخبرة

                            أختى قلبى ضاع معك ...... كلامك جميل ومبشر ... بس أنا كمان ببشرك إنه إن شاء الله إبنك لما يوصل لسن بنتى دلوقتى إن شاء الله هيكون زيها وأحسن ... لأنها وهى عندها سنة و4 شهور كانت زى حالة إبنك بالضبط وبمجهود قليل وصلت لكدة الحمد لله فلو كثفتى مجهودك مع إبنك ممكن تلاقيه بقى أحسن من كدة لما يوصل لسنتين إن شاء الله

                            م.شيواو

                            جزاكم الله كل خير على الإهتمام ده جعله الله فى ميزان حسناتكم يارب وأتمنى إن الأخت نبراس تقرأ الموضوع وأنا شرحه فيه حاليا مع إنها قبل كدة بست شهور كانت مختلفة عن كدة خالص وحاسة إنها بتتطور ببطء بس بتتطور فى حاجات كتير بدون مساعدة أو تدخل ودى أغلب تطوراتها لأنى حتى الأن مبدأتش معاها علاج أو حمية سوى بس إنى بديها أوميجا 3 ومن أسبوعين بس بدات أحاول أدربها بنفسى
                            فى الموضوع ده حالة بنتى بالتفصيل وهى عندها منذ الولادة حتى سنة و5 شهور ياريت الأخت نورس تقرأه وأكون شاكرة ليها جدااااا
                            أنا عارفة إن الكلام هيطول وممكن ياخد من وقتكم حوالى 10 أو15 دقيقة بس عشمى فيكم إنكم هتساعدونى وهتقرؤه وتقلولى رأيكم بصدر رحب لأنكم أكتر ناس حاسين بيا وبقلقى و أنا كمان محتاجة أكتب الكلام ده علشان أجمع أفكارى وأنشط الذاكرة بتاعتى قبل ما أعرضها على أى دكتور علشان تكون ردودى جاهزة على أى سؤال ممكن يسألهولى .. وكمان الصورة تكون


                            وفى موضوعى ده تطورات حالة بنتى حاليا فى ردى على أختى نهى لما طلبت منى تقييم لحالة بنتى
                            وياريت أعرف رأيها ووجهة نظرها وأكون متشكررررررررررة جدااااااااا وأنا متأسفة جدااا إنى هتعبها معايا وهاخد من وقتها كتير بس ربنا يجعلوا فى ميزان حسناتها إن شاء الله

                            تعليق

                            Loading...


                            يعمل...
                            X