انا اتضحك عليا يا جماعة ( فى مركز تأهيل )

انا اتضحك عليا يا جماعة ( فى مركز تأهيل )

السلام عليكم ورحمة الله وبركاته

ازيكم جميعا
يارب بخير

بصوا انا ححكيلكم اتضحك عليا ازاى
بس ياريت تتحملونى

اصلى زعلانه جدا
ان الناس ما بقاش عندهم ضمير للدرجه دى
وبيستغلوا الناس اللى نفسهم يخلوا ولادهم احسن ناس
وبيتعلقوا بأى حاجه يحسوا انها ممكن تساعد اولادهم


المهم انا لقيت مركز تأهيل وجمعية مشهرة والمفروض انها معروفة
فرحت اوى وقلت اودى ابنى وكان عمره سنة و3 شهور
المهم اول يوم اخدت منى 30جنية وقالتلى الجلسه دى ليا انا
وسالتنى انا بعمل ايه وعملت ايه مع سيف من اول ولادته
المهم حكيتلها الحكايه وقالتلى بعد اسبوع تعالى وهاتى سيف عشان جلسته
بس سيبى 25 جنيه مقدما للحصه الجاية قلتلها اوكى
قالتلى ده بس عشان نضمن انكم تهتموا بالطفل وتيجو ...

وحولتنى لدكتور امراض نفسيه وعصبية تبعهم طبعا
رحت له ما عملش اى حاجه غير انه سالنى بس انتو قرايب انتى ووالده ولا لا
هو بياكل ولا لا
هو بيشرب ولا لا
واساله كده
وبعد ما خلص حولنى للمركز تانى وقالى اعمليله تدخل مبكر وعلاج طبيعى
بس ماعملتش العلاج الطبيعى لان عنده ثقبين فى القلب قلت لما اسال دكتور القلب الاول

المهم روحت الميعاد للمركز ومشرفة المركز قعدت معاه ساعه الا ربع
خلته يمسك شخشيخه ويشد لعبة بالخيط وحاجات كده هو اصلا بيعملها من زمان
وقالتلى كويس
وتانى اسبوع
نفس الالعاب ولعبة زايده كمان

بعدين قلتلها ايه رايك فيه قالتلى كويس بس متأخر 5 شهور
قلتلها عرفتى ازاى قالتلى من تصرفاته
مع انها كل اللى عملته معاه اللعب بس وهو عملهم كلهم
معرفش قالت متاخر على اى اساس

المهم انا كان لازم اسافر فقلتلها انى حسافر وكده فقالتلى طيب خدى برنامج لمده شهر
امشى عليه لحد ما ترجعى قلتلها اوكى
قالتلى تمنه 150 جنيه قلتلها حاضر وما اترددتش
المهم لقيت البرنامج عباره عن 10ورقات

فيه التنمية السلوكية والحركية والاكل .. الخ

سالتها البرنامج ده لكل الاطفال اللى فى سنه؟
قالتلى لا ده له هو مخصوص وفضلت سهرانه للفجر عشان اعمله
قلتلها شكرا لتعبك

بس لقيت انها كاتبالى حاجات هو بيعملها مش محتاجه اعلمهاله تانى
وانه يرضع بالبيبرونه ويمص الاكل السائل
وهو اصلا بطل يرضع من زمان وبياكل اكل عادى ما شاء الله مش مهروس ولا سائل
وقلتلها كده وطنشتنى وقالتلى لازم يتعلم الحاجات دى عشان عمره اد كده

اخدت الورق وسافرت واتصلت بيا كذا مرة عشان تشوفنى حرجع امتى
ولحد دلوقتى انا ماسافرتش وهو دلوقتى عمره سنة ونص
واصلا قررت ما اروحلهاش تانى

وكانت المفاجأة امبارح
والصدمة

انى لقيت الكلام اللى فى الورق بتاعها متاخد من برنامج البرتج بتاع ام محمود
كلام ام محمود بالنص مش متغير حتى حرف
يعنى مش جايبه حاجه من نفسها ولا سهرت للفجر تعمل فيه
وكمان اديتنى البورتج بتاع العام الاول
من صفر- لسنه
وهو كان سنة و3شهور
يعنى المفروض تدينى بتاع من سنة لسنتين
وكمان مش كامل يعنى ما ادتنيش البرنامج كله
اديتنى حاجات بسيطه عشان اروح الشهر اللى بعده تدينى جزء تانى
وتقولى انه متاخر 5 شهور
وهى اصلا بتدينى برنامج لسن اصغر من عمره يعنى هى اللى حتأخره

بجد اتصدمت جدا امبارح والله وزعلت اوى
ومش عارفة ازاى الناس دى بتعمل كده
حسبى الله ونعم الوكيل فى كل اللى بيستغل ضعف وحاجه الناس
والفلوس اللى بياخدوها من الناس بالغش

مش مهم الفلوس تروح كلها فدا لاولادنا
لكن تروح فى حاجه حتساعدهم وتخليهم احسن
مش تروح لناس مستغله مش حتنفعهم بحاجه


انا اسفة طبعا طولت اوى عليكم
بس بجد كنت مخنوقة وحبيت اقولكم اللى حصلى
ومنتظرة تعليقاتكم

---

hkh hjqp; ugdh dh [lhum ( tn lv;. jHidg )

السلام عليكم ورحمة الله وبركاته ,,,
أدعو الله سبحانه وتعالى أن يشفي لك إبنك ويعافيه ويعفو عنه وكنت عاوز أقول ليكي على حاجة إن كل اللي إنت كتبتيه أثر في جدا ، وأنا واحد من الناس اللي حصل معاهم قلة ضمير وكذب وخيانة للعهد من مركز إسمه المستقبل السعيد والمتواجد في مساكن شيراتون - مصر الجديدة - القاهرة - جمهورية مصر العربية ، إبني رجع من عندهم قفاه وظهره وكتفيه متشرحين و مدممين بسبب قلة الضمير إن الكاذبين وعلى رأسهم جيهان خواسك ويسرية ومن المفترض أنهم ستات كبيرة في السن لا يكذبوا ويخافوا الله ، ولما واجهناهم بما حدث أنكروا في منتهى عدم الضمير ، وحسبي الله ونعم الوكيل فيما حدث لإبني ، وفوضت أمري لله ، وربنا ينتقم منهم ، وللأسف إن صاحبة المركز محترمة ولكنها لا تتابع بجدية المركز وما يحدث فيه من إنتهاكات ، وعليه سحبت إبني من عندهم . أسأل الله العظيم رب العرش العظيم أن يشفيه .

لا حول ولا قوة الا بالله
طيب ليه بيعملوا كده يعنى
دول اطفال لا حول لهم ولا قوة
والمفروض ان المراكز دى هى الامل بالنسبة للاهل وللاطفال
وانهم يساعدوهم ويقفوا جنبهم ويساعدوهم

منهم لله والله

وربنا يشفى ابنك وابنى وكل اطفال المسلمين يارب
واحسن حاجه انك تقرأ المعلومات من النت وتطبقها انت على ابنك
سواء تدريبات ذهنية او جسديه
لان اللى اكتشفته ان انت الوحيد اللى حتخاف على ابنك ماحدش حيخاف عليه
وما يغركش الشعارات اللى بيقولوها اننا بنهتم وبنطور وبنصلح
كل ده كلام عشان يكسبوا فلوس وبس
بس ربنا موجود وكبير
وهو اللى حياخد باديهم وحيخليهم احسن الناس باذنك يارب

مشكور جدا على تواصلك
وتعليقك
دمت سالم وبخير

لا حول ولا قوه الا بالله. حاميها حراميها. الزمن صار بسهول والناس ما عندها ضمير أنا وديت ابني لدكتور لمده شهرين أخد تمانيه الاف درهم واكتشفنا انه بيتعامل بالتنويم المغناطيسي. ابني لم يستفيد بشيء فقط زاد الخوف عنده واصبح جبااااااااان حتى الحمام الله يكرمكم لا يذهب اليه لوحده وممكن ان يبول على نفسه ولا يدخله لوحده. حسبنا الله ونعم الوكيل في كل ظالم استغل فرصه ان ابني توحدي لا يتكلم

يا نهار ابيض
تنويم مغناطيسى؟

لا حول ولا قوة الا بالله العلى العظيم

والله مرايم الواحد مش لاقى كلام يقوله
انا كنت بحسب ان الحاجات دى مش منتشرة اوى كده
او ان انا بس اللى اتضحك عليا

طلع الناس كلها كده
يارب سترك

منهم لله

مشكورة حبيبتى على تواجدك
وردك وربنا يشفى ابنك العزيز وتشوفيه احسن واحد فى العالم

حسبي الله ونعم الوكيل

هههههه فعلا هم يبكي وهم يضحك
يا امهات واباء النصب عيني عينك ولو اكتب لكم بالترتيب المنطقي والزمني للنصب من الطبيب اثناء تحليله للطفل الدم لمعرفه انه داون الي تسليمه للمراكز تدريجيا هتقولوا ام محمود ايه ؟
علشان كده انا بكتب لكم البرامج والتدريبات وامانه عليكم كل من يرزق بطفل متلازمه داون يتريس ويقراء المنتدي والمدونه
هتتوجع عيونكم شوي بس فلوسكم وفروها للالعاب التعليميه ومصاريف دكاتره الاطفال للمضادات والمكمل الغذائي

صدقوني اطفالنا محتاجين الام والاب يكونوا معلمينهم
المراكز بكل مكان للاسف الان مبتزه
اليوم حكت لي ام لطفل ماساه كهذه
والابشع انه ضلها في اشياء

ومن هنا ننادي ونناشد كل من لديه علم او مهند لا تتجاروي بعقول اطفال ابرياء
بالله عليكم يكفينا قلوبنا الداميه علي اطفالنا
لا تبتزوا اولياء الامور

اشكرك ام سيف للتنويه
وياريت كل ام تدخل وتتشجع وتكتب ما يحدث لها
وتكشف ستر كل افاق

اولا شكرا يا ام محمود على تثبيتك للموضوع
واهى فرصه كويسه علشان نشوف النصب اللى بيحصل لاطفالنا الابرياء
اللى مالهمش ذنب فى اى حاجه

بس ما كنتش اعرف ان حضرتك كمان اتنصب عليكى وكتير اوى كده
عموما معلش الحمد لله انك بخير ومحمود القمر كويس
وحيبقى احسن واحسن ان شاء الله طول ما حضرتك معاه وبتساعديه

بس بما ان ده اول طفل ليا وطلع داون والحمد لله على كل حال
فما كنتش عارفة اعمل ايه وكنت زى التايهه بصراحه
او الغريق اللى بيتعلق بقشه
نفسى فى اى معلومه او اى حد يفهمنى يعنى ايه داون وبيتعاملوا معاهم ازاى

لحد ما ربنا هدانى لهنا الحمد لله
كل الناس اللى هنا وحضرتك طبعا ناس محترمين وكفايه اننا حسين ببعض
لان المنا واحده ومشكلتنا ومشكله اطفالنا واحده
وماحدش حيحس بينا غيرنا
جزاكم الله كل

ومشكورة ياقمر على تواصلك

حبيبتي ام سيف ان شاء الله ربنا يعينك علي حسن رعايته ويكون احسن الناس وترزقي بذريه صالحه تكون خير عون لكي ولسيف
باذن الله وانتهزي فرصه عدم انشغالك عن سيف وتفرغك له وتابعي معه
ولا تتركي نفسك فريسه للمستغلين من النت او من المراكز
واقرئي واستوعبي ما تقرئيه وكلما قرئتي كلما قدرتي تصلي بسيف بممارسه تدريباته بطرق افضل ان شاء الله
بخصوص النصب علي
انا كنت مثلك ام محتاره ومتعلقه باي قشه لاصل بابني لبر الامان تعثرت امامي سبل اعاشه ابني
وكنت اتمني اري اي طفل او اي اسره عندها مثل محمود
ولا زلت ابحث ولن اقف
واتمني ان تثابري مع سيف وتجعليه هدفك تصنعي منه اجمل طفل وشاب جاهدي معه والله لن يضيع لكي تعب ان شاء الله

اللهم امين يارب

معلش باه يا قمر
الواحد مش بيتعلم بسهولة
لكن الحمد لله ان ربنا هدانا لطريق صحيح نعلم به ولادنا

والله يا ام محمود
اعرف واحده بتشتغل فى مركز فيه اطفال من ذوى الاحتياجات الخاصة
(العقلية) ربنا يشفيهم يارب

بتقول ان المراكز دى بيجيلها اعانات وفلوس من بره مهولة
علشان يصرفوها لتنمية قدرات الاطفال دى
وكمان بيجيلهم فلوس عشان اسر الاطفال والمفروض بيبقى لهم
مصروف خاص للاكل وحاجات كتير كده

طبعا مافيش حاجه من دى بتحصل
والفلوس دى كلها بالملايين بتروح للمديرين والمسؤلين
وماحدش من الاطفال ولا اهلهم بيشوفوا جنيه حتى

وطبعا بيجيبو للاطفال دى العاب تافهه او دباديب
حاجات ماتنميش مهارات ولا قدرات ولا اى حاجه
حسبى الله ونعم الوكيل فيهم

كل واحد عايز يجيب فلوس ويسرق
يفتح مركز او جمعيه لاطفال ذوى احتياجات خاصة

مش عارفين ان فى ربنا
حاجه بجد تحرق الدم
طبعا حضرتك بتحطيلنا فيديوهات كلها من بره
لاطفال اجانب وشايفه الامكانات والالعاب
طبعا مفيش وجه مقارنه بيننا وبينهم

نفسى اشوف حاجه زى كده فى مصر او الدول العربية
ويهتموا باطفالنا