تويت
حريه اتخاذ القرار
للكاتب : محمد شاهين
كلنا عايزين نتمتع بحريه القرار ...نفسي محدش يقولي اعمل ايه و متعملش ايه....نفسي محدش يتدخل في حياتي . بصراحه و عشان ماكونش كداب: الموضوع ليس بالسهوله تخطيه . لانه مش بس له علاقه بضعفك في الحركه, لا ده ليه ابعاد نفسيه و اجتماعيه مبنيه علي بعض و تراكميه بقالها سنين.
حريه اتخاذ القرار مش لازم تبقى في قرارات مصيريه زي قرار زواج او دراسه او عمل .. ممكن تكون في اشياء صغيره جدا متعلقه بالحياه اليوميه , على سبيل المثال اذا كنت قاعد مع ناس و عايز تقرر انك تمشي بس مش عايز تقول لان جواك حاجز نفسي و هو ان حد بيتحكم في حركتك و لازم تطلب انك تروح هنا او هنا و طبعا محدش هايقولك لا بس انت مش عايز تبقى متعب او تمشي الكل على مزاجك. و تبص تلاقي نفسك محاصر مش عارف تستمتع بالقعده ولا عارف تمشي و تعمل حاجه تانيه: و طبق على كده حاجات تانيه كتير عايز تنزل من البيت او عايز تاكل اكله معينه في وقت معين و كده. في الحقيقه هو ده السبب اللي بيخليني احاول اكسر الاعاقه كل يوم لان الانسان الحر عايش و مش عجيبه ان مئات الناس بيموتوا في المظاهرات في سبيل الحريه.
الحل موجود و منطقي برضو بس طويل و مبني على بعضه عايز تفكير و تخطيط مسبق و خطه لما تريد فعله و بجد هتلاقي كل حاجه ماشيه بنعومه و سلاسه و كانك مؤلف ماسك كل خيوط الروايه في ايدك.
حاول بقدر الامكان ان محدش يشيلك : اللي بيتشال دايما بيبقى ضعيفو بيدي ايحاء بالضعف , دي طبيعه البشر في عقلنا الباطن اللي بيتشال ده طفل او مريض و بالتالي الطفل غير قادر على اتخاذ اي قرار و المريض ضعيف لازم نريحه من عناء التفكير. و انت لا طفل ولا مريض لكنك فقط محدود الحركه.
على فكره العلم الحديث حل معظم مشاكل الحركه دي بوسائل بسيطه و سهله معظمها ممكن تتعمل و مش لازم تتجاب من بره و في بعضها طبعا مكلف بعض الشيء بس بيتجاب مره واحده في العمر و عائده كبير جدا عليك فا مش خساره فيك. بس اهم حاجه تختار اللي يناسبك من ادوات و مش شرط تكون موحده.. يعني الكراسي المتحركه مش كلها زي بعض و كمان في مقاسات كمان حسب لياقتك البدنيه و حالتك الصحيه و طولك ووزنك. على فكره ده علم و في ناس متخصصه فيه في اوروبا لما بتشتري كرسي جديد بياخدوا مقاساتك زي الترزي كده و يعملوا اللي يناسبك و يناسب حالتك (نظرا لندره هذا التخصص هنا فلازم نعلم انفسنا بانفسنا) و باذن الله في مقال اخر هاعرض الطرق الصحيحه لاختيار الكرسي المناسب.
اذا كان ذراعاك يعملان بشكل جيد عود نفسك ان محدش يزقك.. اتمرن فى اي مطلع عشان تقدر تمشي في الشوارع الجميله بتاعتنا . و خليك فاكر القاعده الذهبيه دي "في الاعاقه اللي بيروح مبيرجعش" يعني لو ذراعاتك قويه حاول باقصى مجهود انك تدربهم كويس و اذا ضعفوا في احتمال كبير متعرفش تقويهم تاني الا بالعلاج, نفس الشيء في الارجل اذا كنت بتقدر تحركهم اوعى تتكسف انزل عالارض و ازحف في اوضتك كل يوم و لو ربع ساعه هتفرق كتير لان ببساطه, اللي بيروح مبيرجعش. و اذا كانت اعاقتك في ايدك حاول تجيب كرسي بيعمل بالبطاريات بقت اسعارهم مش غاليه قوي زي زمان و بقى وزنهم خفيف و لو عايز تاخد فكره شوف الموضوع ده . المهم تعمل اي حاجه عشان متعتمدش على نفسك في الحركه.
تاني حاجه و دي اللي صعبه شويه و هي عدو الكرسي رقم واحد: السلالم
لازم حد يشيلك لو في سلم طبعا و ياسلام بقى لو 4 او 5 .. بتبقى هيصه و يا سلام لو حد اتزحلق ولا ضحك (و ربك هو اللي بينجي)
زي ما تفقنا قبل كده انك قادر على تخطي اي عائق , ايوه ممكن بس فكر معايا بشكل منطقي . ربنا خلق للانسان رجلين و علمه يحط واحده قدام التانيه عشان يمشي فمن المنطقي انه لو عايز يتنقل لمستوى عالي انه يطلع درجه درجه على قد خطوته لا يقدر على القفز كل السافه مره واخده و الا كان ربنا خلقه زي البرغوث ينط قد طوله 200 مره. فالبالنسبه للبرغوث .. الانسان معاق لانه يدوبك بيقدر يقفز ضعف طوله و مش اي حد كمان دول امهر لاعبي القفز العالي. لكن الانسان عنده عقل تغلب على اعاقته باختراع السلالم, اذا من المنطقي انك تلاقي حل لاعاقتك على السلالم الا و هي المطالع الصناعيه او "Ramps" زي ما بيسموها في الخارج و دي شويه صور ليها:
على فكره في شركات كتير متخصصه في صناعتها بس زي ماحنا شايفين فكرتها بسيطه ممكن اي نجار او حداد يعملها و تتحط على السلم العادي بشرط الا تزيد زاويه الانحدار عن 45 درجه و بعديها يتقلب الكرسي للخلف. بكده لو عملت المطالع دي على سلم البيت هتبقى عندك حريه الحركه من غير ما حد يشيلك داخل طالع براحتك شوف دي تساوي كام, انا شخصيا ريحت دماغي و سكنت في الارضي لكن برضو عامل مطلع عشان في 3 سلالم عتبه.
لا تعتمد كليه على شخص واحد:
اي انسان عنده اعاقه بيبقى بطبيعه الحال انسان متواضع طيب ابيض القلب يحب الابتسامه و ده راجع لانه تجاربه في الدنيا محدوده لم تلوث بالاخطاء و ما الى ذلك, عشان كده بيبقى محبوب و كل الناس بتبقى عايزه تخدمه. لكن برضو بطبيعه الحال لا يطلب من اي احد اللهم الا من يثق بهم و ده بيخلق مشكله غير محسوسه تتضخم مع الوقت الى ان تسبب مشاكل في العلاقات الاجتماعيه. المثل يقول اذا كان حبيبك عسل....... ايوه فعلا كل انسان له طاقه و عندما تحمله اكثر من طاقته يبدا بالتصرف خارج المالوف هتلاقي واحد يزعل وواحد يتحكم فيك يعني رد الفعل مختلف .... طبعا ان ليك حدود في الحركه و مهما عملت في حاجات مش هتعرف تعملها لوحدك فلازم تبقى عارف النقطه دي كويس , عندما تحتاج المساعده لا تطلب نفس الطلب من نفس الشخص مرتين يعني على سبيل المثال ملح السفره بيتحط في مكان عالي اطلبه مره و ضعه في مكان منخفض حتى لا تطلبه مره اخرى و صدقني محدش هايلاحظ مكانه بس ليك تفرق كتير و اذا لم تجد مكان مناسب خصص لنفسك ملاحه منفصله و ضعها في درج مكتبك . لا تطلب من شخص قصير ان يحضر لك شيء في فوق الدولاب, لازم يبقى عندك تقدير لحاله الشخص اللي قدامك قبل ما تطلب الطلب ممكن يجيله احباط و مايسمعش كلامك مره اخرى في حاجه تانيه او الاسوا يتهرب منك و دي بتبقى مش ظريفه . ايضا لا تخاف او تخجل من طلب المساعده من الاغراب في حدود الادب و اللياقه يعني موبايلك وقع في الشارع هتتكسف تطلب من حد يناوله لك و تسيبه يتسرق؟ الحكايه دي هاتخرجك من مواقف كتير جدا لما تبقى لوحدك و تمر بمشكله لان حريتك ليها برضو اخطار لازم نضعها في الحسبان قبل ما نقدم عليها .
دلوقت انت بقيت حر الحركه حر اللسان حري الرغبه حر قرارك في ابسط الاشياء و صدقني اذا طبقت المنطق ده على جميع مشاكلك ستجد حلول لمشاكل يعجز عن حلها اي حد و متنساش ان الحالات اللي في المقال امثله تعبر عن منطق و يمكن تطبيقها في اشياء اخرى
و اذا كان عندك اي استفسار او تود ان اطرح قضيه معينه تهمك اترك تعليق في مدونتي
محمد شاهين
تعليق