منتـديـات تحــدي الإعـاقـه

منتـديـات تحــدي الإعـاقـه (http://www.t7di.net/vb/index.php)
-   مهارات وتطورات اطفالنا (http://www.t7di.net/vb/forumdisplay.php?f=88)
-   -   مواقف يوسف لعب*ضحك*حزن*شاركوني بمواقفكم (http://www.t7di.net/vb/showthread.php?t=33771)

شروق الأمل 20-12-2009 09:07 PM

مواقف يوسف لعب*ضحك*حزن*شاركوني بمواقفكم
 
السلام عليكم و رحمة الله و بركاته

كنت افكر اكتب هذا الموضوع من زمان بس قلتم جنى سبقتني بالموضوع

لكن لما حطيت المواقف في موضوعها حسيت اني غيرت مسار الموضوع

علشان كذا هذا الموضوع هنا نفرفش فيه و نذكر مواقف متنوعه من الحياه
و طبعا بما ان يوسف اكبر واحد في الداون الموجودين في المنتدى فالمواقف لا تعد و لا تحصى و لكن الذاكره لكم عليها مو كل المواقف اتذكرها



المهم اول شي هذي المواقف اللي سبق و نزلتها في المنتدى و ان شاء الله كل كم يوم انزل موقف جديد علشان اتذكر مضبوط



اول موقف و اللي لايمكن انساه
كان في الحرم و بالتحديد في التوسعه و من زماااان
يعني كنت انا باقي في الابتدائي يمكن عمري 9 سنوات او حولها
المهم احنا في العاده ننزل الحرم قبل المغرب نفطر و نصلي و نجلس لصلاة التراويح و نأخذ نص التراويح مع الامام الاول و نطلع يعني ما نكمل مع الامام الثاني
و هذاك اليوم الظاهر والله اعلم انه بين المغرب و العشاء
طلبوا اهلي اني اروح اجيب موية زمزم
و تعرفون ان اللي في التوسعه موية زمزم موجوده بعد الحاجز اللي يحدد مكان الحريم او الرجال
و رحت اجيب مويه
و لما رجعت قالوا اهلي وين يوسف؟
قلت ما ادري!!
قالوا هو جا يجري وراك
انا هنا كلهم متهميني اني ما اهتميت فيه
و انا احلف لهم اني ما ادري
هم الظاهر نادوني و قالوا يوسف وراك بس انا ما سمعت
و رحت ادور له ماحصلته
و رجعت قلت لهم
طبعا صارت حالة استنفار يدورون
و بدأت صلاة العشا و جلسوا اهلي يصلون و احنا يالبنات ندور
و اصلا اول ما ضاع و ما حصلناه راح ابوي بلغ انه ضايع
طبعا اللي ورانا نادت اولادها و بناتها و نادتني قالت كيف مواصفاته و اوصفه لها
و ارسلتهم كل واحد في اتجاه يدورون له
و احنا كل شوي تروح وحده تدوره و الباقين ينتظرون علشان اذا وصلنا خبر او شي ما نكون متفرقين
الله يجزاها خير اللي كانت ورانا والله كل ما اذهكرها ادعي لها لانها من جد حتى هي ضيعت صلاتها و جلست تدور معانا هي واولادها و بناتها
صايره كأنها منّا
المهم خلصت صلاة التراويح و احنا ولا حس و لا خبر
شوي الا ابوي جاي و معاه يوسف
و مشينا كلنا ما نقدر نتكلم لان تعرفون الرجال اذا كان معصب محد يقدر يتكلم معاه
و طبعا اكثر عصبيته كانت خوف من يكون احد اخذه او صار له شي
راح الغى البلاغ و طلعنا الشقه
و جلس يقول لنا كيف حصله
يقول و انا جالس اصلي يقول ما ادرياصلا وش اقول في الصلاه كل همي من اصوات الاطفال لا يكون هذا صوت يوسف
المهم يقول بعد ما دعى الامام و خلص و سلم جلست اسبح و ادعي انه يرجع
يقول شوي الا اطفال جوني قالوا انت ولدك شكله كذا و لابس كذا؟
قال ابوي ايه يقول و ياخذوني و يودوني الا هو جالس يبكي و الاطفال متجمعين حوله يبون يسألونه و هو طبعا ما يعرف احد علشان كذا اللي ما يعرفهم ما يكلمهم غير خوف لانه لوحده غير انه مافي احد بيفهمه
عاد وين حصله؟!
انا اقول لكم
في التوسعه من تحت بيوت آل سعود
فيه مكان للحريم بعدين مكان للرجال بعدين مكان للحريم
احنا حصلناه بعد مكان الحريم الثاني
يعني راح من عندنا و تعدى مكان الرجال و تعدى مكان الحريم و جلس يبكي

من يومها مايفارقنا
و سوينا له بطاقه فيها صورته و اسمه و ارقام جوالات ابوي و اخواني و غلفناها تغليف حراري و حطيناها في محفظته بس من بعد هذا الموقف ما يبتعد عنا لانه صار عنده خوف انه يبتعد عنا و الحين الحمدلله كبر و انتهت المشكله

شروق الأمل 20-12-2009 09:08 PM

رد: مواقف يوسف لعب*ضحك*حزن*شاركوني بمواقفكم
 
هذا الثاني
طبعا قبل بداية رمضان هذي السنه جلس يوسف تعبان يمكن اربع ايام حمى و اللوز ملتهبه بشكل
و بلغم الله يكرمكم
يعني تعبااااان
و هو متعود اذا ارتفعت درجة حرارته لازم اجلس جنبه لانه يخااف
المهم من تأثير اللوز صاير ما يقدر يمشي زين لانها مأثره على عظامه
و لما قلت له يقوم يغسل وجهه صاير كأنه داااايخ شكله مره خوفني بس ماسكته و طايح علي
المهم
لما جا رمضان يوم يتحسن و يوم ينتكس
في الاخير قال ابوي مافي فايده من المستوصف باوديه مستوصف خاص مشهوور عندنا
المهم لما رجع من صلاة التراويح وداه المستوصف
و طبعا مطولين لان زحمــــــــــــــــه المستوصف يطول في الانتظار
و شوي الا ابوي متصل علي قال يوسف لما جينا نعطيه المغذيه قال نادوا لي شروق الأمل
و جلس يكلمني و هو شوي و يبكي

المهم بعد يومين انتكس من جديد قلنا بنوديه مره ثانيه
قال ابوي تعالي معانا
و لما جوا يعطونه المغذيه نفس الشي جلس يبكي يقول نادوا شروق الأمل تمسك يدي
و ما رضي يدخلون المغذيه في يده الا بعد ماجيت و جلست معاه
الممرضه مصريه و الظاهر من الاسكندريه جلست تسولف معاه و هو انبسط

شروق الأمل 20-12-2009 09:09 PM

رد: مواقف يوسف لعب*ضحك*حزن*شاركوني بمواقفكم
 
هذا الثالث


طيب هذا موقف ذكرتني فيه امي قبل ما اذكر باقي المواقف اللي وعدتكم فيها
احنا معودين يوسف من زمان ان معاه جوال بشريحه مسبقة الدفع
و مسجلين ارقامنا يعني حاطين الاتصال بارقام محدده علشان محد يلعب عليه و يتصل من جواله

المهم و في المدرسه فيه حمامات خاصه و في وقت الفسحه يقفلونها علشان الطلاب الثانين ما يدخلون فيها و يخربونها عليهم

و هذاك اليوم يوسف دخل الحمام و انتم بكرامه و طول وجا وقت الفسحه و قال المدرس لواحد من الطلاب روح قفل الحمامات حقتكم علشان مايدخلها احد
و جا يوسف يطلع حصل الباب مقفل
و في الفسحه و مع الازعاج للطلاب مايسمعونه

بس طلع ذكي وطلع جواله و اتصل على ابوي حصل الجوال مقفل
اتصل على البيت و ما في احد يرد لان اهلي ماكانوا في البيت
و كان بيتصل علي بس انا منبهته ما يتصل علي وقت الدوام لاني في الجامعه و الجوال وقت المحاضره و مع الهزاز احسه يربكني

المهم مابقي الا أمي و يتصل عليها و يقول لها تخلي ابوي يكلم استاذه
و اتصل ابوي على استاذه و بلغه و جت سليمه الحمد لله

و للمعلوميه كل ما درسه معلم جديد جاب رقمه و سجلناه في جوال ابوي علشان وقت الحاجه
هذا غير زيارات ابوي لهم في المدرسه

شروق الأمل 21-12-2009 12:49 AM

رد: مواقف يوسف لعب*ضحك*حزن*شاركوني بمواقفكم
 
و هذا موقف جديد يقولنا عليه ابوي بس ربي ستر

كان مره في استراحتنا و المنطقه كلها اراضي زراعيه

و كان المكان مسوي مثل المطبات
مثل هذي الصوره
http://i358.photobucket.com/albums/o...ka9199/1-2.jpg
او هذي
http://i358.photobucket.com/albums/o...untitled-1.jpg

و للمعلوميه هذي الصورتين من مدينتي
المهم
كان ابوي و يوسف جنب استراحتنا
و كان في سيارة وانيت بصندوق
و كان يوسف في الصندوق

دخل ابوي الاستراحه علشان يقفل بوابتها لان اليوم الاول كانت امطار و رياح قويه و انفتح الباب من قوة الرياح

يقول شوي اسمع صوت يوسف يناديني
ياأبوي

الحقنـــــي

يا أبوي

يقول لما طلعت اشوف وش صار لقيت السياره دحدرت (يعني تمشي على ورى ) و الاراضي اللي وراها كلها نازله تحت

لحد ما وصلت ارض في الاخير مستويه ماوراها نزله ولا شي

المهم من بعد هذاك اليوم يوسف صاير يخاف من السياره انها تتحرك و هو فيها
و اللي سلمه انه ماحاول ينزل منها بالعكس تمسك بيديه في النص علشان تتوازن و السياره نزلت على الاربع كفرات كأنها تقول ارتاح ما بانقلب فيك



علشان كذا انتبهوا لعيالكم يجلسون في السياره لوحدهم حتى لو مو عند الدركسون لايصير مثل ماصار مع يوسف لان الارض كانت طين بعد المطر

ام محمود 21-12-2009 01:06 AM

رد: مواقف يوسف لعب*ضحك*حزن*شاركوني بمواقفكم
 
برافو شروق الامل فكرة رائعه تعملي ملف لسيد الرجال يوسف زينه شباب متلازمة داون
هتكون عندنا ثروة معلومات ومواقف ليوسف وهنستمتع بالمشاهده وهتعلمنا كثير ان شاء الله
بلادكم رائعه صورها
شوقتيني ازوركم
خاصه الشتاء علشان ما حد يشوف حد من الضباب

سليمه يا يوسف السيارات دائما تمشي بمزاجها
الله قدر ولطف وان شاء الله تنسي الصدمه
بس فين فرامل اليد يا بابا كنت رفعتها
افضل شيء هنضع قالب طو ب امام الاطارات حتي لا تجري السيارة
كل مواقفك عسل
شروق لا تبخلي اريد الصغيرة قبل الكبيرة
احكي كله
القمر يوسف في الصورة الرمزيه كوووووول ومش معقول ياريت كان عندي بنت كنت خطبتها له غصب عنه
شياكه والاجه ما بعدها

شروق الأمل 21-12-2009 01:16 AM

رد: مواقف يوسف لعب*ضحك*حزن*شاركوني بمواقفكم
 
اقتباس:

بس فين فرامل اليد يا بابا كنت رفعتها
والله ياشيخه انه رفعها بس الارض طين و مدري كيف مشت السياره
الحين العب عليه اذا بقيت في السياره معاه و ابوي نزل اسوي اي حركه في السياره اني ابي اخليها تمشي
او في البيت اركب السياره و اقول باشغلها على طول ينزلني بس الحين افضل من قبل مايخاف كثير


اقتباس:

شروق لا تبخلي اريد الصغيرة قبل الكبيرة
احكي كله

ابشري تامرين امر باقي تقولين اسكتي بس ريحينا ههههههههههههههههه


اقتباس:

ياريت كان عندي بنت كنت خطبتها له غصب عنه
شياكه والاجه ما بعدها

لالالالالالالالالالالالالالالالالالالالالالالالالا لالالا
كله الا كذا
اصلا حتى لو اهلي وافقوا انا مو موافقه بعدين العب مع مين؟!!

تسلمين على مرورك نورتي صفحتي

’’ جـــنى ’’ 21-12-2009 04:56 PM

رد: مواقف يوسف لعب*ضحك*حزن*شاركوني بمواقفكم
 
السلام عليكم ورحمة الله وبركاته

فكره راااائعه شروق الامل
لا انا فكرتي مواقف سلوكيه وكيفية تعديلها
انتي موضوعك عن المواقف السعيده ربي يسعد كل ايامك
صراحه موقف السياره انا جالسه اقرا وحاطه يدي على قلبي من الخوف
الحمد لله ربي ستر
من المواقف
لمى كانت جنى صغيره لسى بالكافوله
كانت اختي اللي اكبر منها تغاار منها كثير
وجنا كنا حاطينها على السرير وماكان احد بالغرفه ودخلت اختي اللي تغار منها وسحبتها من المفرش حقها
وطاحت على الارض والارضيه رخام يعني الطيحه جامده لكن الحمدلله ربي ستر في سجاده قريبه من السرير طاحت عليها

ام لوجى 21-12-2009 07:02 PM

رد: مواقف يوسف لعب*ضحك*حزن*شاركوني بمواقفكم
 
صراحه موقف الحرم وضياع يوسف يخوف
ماانسى قبل سنوات فى المدينه ام تبحث على ولدها اسمه على وطلعت من قسم النساء للساحه الخارجيه
تبكى وتضرب بيديها حتى انها نست تحط غطاها على وجها وتلف يمين يسار وتمشى وكانها مو فى ويعيها
الله لا يحرم ام من ظناها شى يخوف ضياع الاطفال

اما المواقف اذكر لوجى حطيتها وعمرها يمكن ست اشهر على سر رى وطلبت من اختها تاخذها مافهمت على
وحسبت انى اقول عدليها تركتها على السرير وحطت حولها مخدات لاكن كانت تستطيع الزحف وزحفت معاها المخدات
والسرير مرتفع والارض سيراميك وطاحات وسمعتها من المطبخ واختها طبعا فى غرفتها
ورحت ركض زى المجنونه ابشوف البنت هى من قوت الطيحه سكتت شوى ثم صرخة صرخه مدويه
لاكن الحمد لله لما زحفت زحفت على المخده وطاحة هى والمخده ونصف راسها على المخده والاخر على السراميك
يعنى خف وقع الطيحه لاكن مانساها بغيت اذبح اختاها بس رحمتها جلست تبكى خوف على اختها وائنبها ضميرها
وانا كنت احسب انها فهمت على وشالتها معها الحمد لله شيكت على البنت وطلعت سليمه لان طيحات الراس خطيره
الله يسلم

شروق الأمل 21-12-2009 07:15 PM

رد: مواقف يوسف لعب*ضحك*حزن*شاركوني بمواقفكم
 
جنى

حياك الله ياقلبي
و أنا آسفه غيرت مسار موضوعك لموضوع ثاني
و الحمدلله على سلامة جنى
والله يالطيحات من على الاسره صعبه حيل و خصوصا على السيراميك
اما عندنا اصلا الغرف مفروشه موكيت مانخليها سيراميك علشان الاطفال اول شي و ثاني شي علشان طبيعة المنطقه عندنا برررررررررد

شرفني مرورك غاليتي

لياني 21-12-2009 07:17 PM

رد: مواقف يوسف لعب*ضحك*حزن*شاركوني بمواقفكم
 
مرحبا شروق
موضوعك مميز مواقف سعيدة دي
قلبي راح ما يوقف عالموقف الاخير
الحمد لله جات سليمة

الصفحة حتمتلأ باللعب والضحك
لكن ادا في شوية رعب انا موافقة
مثل الموقف الاخير

شايفة الجميع بدأ يتكلم عن الماسي
جنى يا حبيبتي الحمد لله اجت سليمة

ام لوجي
اي القصة هذي فعلا خوفتيني
ربنا سترها المرة هذي سلمت


ليان عندها مجلد كامل بوقعاتها عراسها كلها سليمة


طيب حنبتعد شوية عن الوقوع والبكاء والصراخ :


كان عمر ليان 8 او 10 شهور وهي مجنونة بشي اسمه ورق بمختلف انواعه
كانت بسريها وامي جات عندها
كان معها محرمة " كلينكس " مستعملة
فنسيتها وحطتها بسرير ليان
ليان بالتاكيد لقتها كنز
وصارت تقلب وتقلب لحد ما وصلتها....
وحطتها بتمها وصارت تاكل فيها


بصراحة انا قرفت


الساعة الآن 11:24 AM.

.Powered by vBulletin® Copyright ©2000 - 2017, Jelsoft Enterprises Ltd
adv helm by : llssll

جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى